Уншиж байна ...

О.Номинчимэг: Төв цэнгэлдэхийн хажууд барьж буй барилга иргэн Т.Нямдаваагийн хүүхдийн компанийнх. Шунал хороолол гэж нэрлэмээр

Б.МАНЛАЙ, IKON.MN
2024 оны 2 сарын 27
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Төв цэнгэлдэх хүрээлэнд үүссэн газрын асуудлаар Нийслэлийн Засаг даргын орлогч О.Номинчимэг өнөөдөр мэдээлэл өглөө.

Тэрбээр "1993 онд Төв цэнгэлдэх хүрээлэнг ягаан тасалбараар хувьчилж, 70%-ийг нийслэлд, 30%-ийг хувийг өмчид шилжүүлж байсан түүхтэй.

2003 онд иргэн Т.Нямдаваа гэдэг хүн 30%-аа 49 болгож, нийслэл 51%-ийн эзэмшилтэй болсон. Гэхдээ 2003 онд үл ойлгогдох байдлаас буюу  400 гаруй мянган төгрөгөөс болж, нийслэлийн хувь эзэмшлийг 49, иргэн Т.Нямдаваагийн эзэмших хувийг 51 болох шийдвэрийг НИТХ-аас бус ТУЗ-өөр шийдсэн байсан.

Бид багадаа төв цэнгэлдэх хүрээлэнд наадам үзэх гэж ирэхэд баярлаад явах талбайтай байсан. Харин одоо төв цэнгэлдэхийг тойруулаад барилга барьсан болохоор наадмын үеэр иргэд, худалдаа үйлчилгээ нь багтахгүй, шахцалддаг болсон. Өнгөрсөн зуны наадмаар бороотой байх үед усанд автаж иргэд алхахад хүнд байдалтай байв.

Ингээд 2005 оноос нийслэл цөөнх буюу 49%-ийн оролцоотой болсон. Түүнээс хойш Төв цэнгэлдэх хүрээлэнг эзэмшиж буй компанийн эзэмшилд 38 га газар байсан. Энэ газрыг 2005 оноос хойш жижиглэж, зарснаас 29 хэсэг салж, одоо цэнгэлдэхийн газрын хэмжээ 12.6 га болчихсон. Гурав дахин багассан. Энэ нь газрыг зарж, идсэн асуудал.

Төв цэнгэлдэх хүрээлэнд нийслэлээс жил бүр урсгал засвар хийдэг. 2008 оноос хойш урсгал засвар, тохижилтод 4.6 тэрбум төгрөг зарцуулсан байна. Энэ төсөв хувь эзэмшилд тооцогдоогүй. Нийслэлийн төсвөөс 4.6 тэрбум төгрөгийн хөрөнгө оруулалт хийчхээд байхад хувь эзэмшил өсөхгүй.

Харин хувийн компанийн эзэмшил их хэрнээ ногдол ашиг олигтой өгөхгүй, байгаа газраа зараад ашиг орлого олдог асуудал байна.

Төв цэнгэлдэхийн газрыг тойрсон асуудал нь шунал.

Удаа дараагийн газар олголтоор Төв цэнгэлдэхийг тойрсон олон барилгыг яах вэ гэдгийг иргэд асуудаг. Үүнээс өмнө ямар арга хэмжээ авч болох вэ гэдгийг харж байна.

Одоо Төв цэнгэлдэхийн хажууд барьж буй барилга нь цэнгэлдэхийн 51%-ийг эзэмшдэг иргэн Т.Нямдаваагийн хүүхдийн Мөнхсан компанийнх. Өөрсдөө газраа хувьчилж аваад барилга барьдаг.

Иргэд зундаа нэг зорьж ирдэг Төв цэнгэлдэхийн үүдэнд баригдаж буй өндөр барилгын газрын эзэмшлийн зориулалт орон сууц гэж гарсан мөртөө баар, үйлчилгээний газар хийе гэж байна. Үндэсний баярын бэлэг тэмдэг болсон газар дээр шунал хороолол бариулмааргүй. Авлига хороолол гэдэг шиг шунал хороолол гэж нэрлэмээр байна.

Төв цэнгэлдэх орчмын газрыг зориулалтын дагуу ашигласан эсэхийг шалгаж барилгын ажлыг зогсооно.

Үүнээс гадна Төв цэнгэлдэх рүү ороход машины төлбөртэй зогсоолыг хууль зөрчөөд хийчихсэн. Ихэнх талбай нь Төв цэнгэлдэх хүрээлэн ХХК-ийн эзэмшлийн талбай. Гэтэл энэ талбайгаас даваад иргэдийн нийтийн эзэмшлийн талбайд авто зогсоол хийчихсэн. Нийтийн эзэмшлийн талбай дээр авто зогсоол байгуулах бол Нийслэлийн Авто Замын Хөгжлийн Газраас зөвшөөрөл авах ёстой ч аваагүй. Зөвшөөрлийн хураамж Замын хөгжлийн санд төвлөрч, авто замын засварт зарцуулагддаг юм. Үүнийг зогсооно. Шуналтай хүмүүст нийтийн эзэмшлийн талбайг үнэгүй ашиглуулахгүй.

Төв цэнгэлдэхийн урагш харахаар хоёр шоурүүм маягийн дүнзэн байшин байна. Гэтэл уг хоёр байшин нь зөвшөөрөлгүй. Газар нь нийтийн эзэмшлийнх. Бас нэг давхар байшин байгаа нь зөвшөөрөлгүй, түгжээтэй. Эдгээр нь хяналтгүй байна. Энэ талаар Төв цэнгэлдэх хүрээлэн ХХК-ийн захирал Т.Нямдаваагаас асуухад "Манайх биш" гэдэг хариуг өгсөн.Т.Нямдаваа гэдэг хүний зөвшөөрөлгүйгээр түгжээтэй нэг давхар байшинг барьсан бол нураана. Газрын албанаас энд ажиллаж байна.

Төв цэнгэлдэх хүрээлэнгийн 49%-ийг нийслэл эзэмшдэг ч улсын бүртгэлийн гэрчилгээн дээр Т.Нямдаваа гэдэг нэг хүний эзэмшилтэй байна. Албан ёсны бүртгэлд нийслэл гэсэн зүйл байхгүй. Компанийн гүйцэтгэх захирал нь Т.Нямдаваа, ТУЗ нь ч мөн энэ хүн, хувь, эзэмшлийг зөв бүртгүүлэх үүргээ биелүүлээгүй. Бүх асуудлаа ТУЗ-өөр шийднэ гэдэг.

Төв цэнгэлдэх хүрээлэн ХХК-ийн ТУЗ-ийн гишүүнээр нийслэлээс хоёр, иргэн Т.Нямдаваа болон дүү, хүүхэд нь байна. Хуулиараа хувьцаа эзэмшигчдийн хурал хийх ёстой ч ТУЗ-ийн хурлаар шийдвэрүүд гаргаад байгаа юм.

Төв цэнгэлдэхийг тойрсон жижиг бүх талбайг гэрээгээр түрээслүүлж байгаа хэрнээ нийслэлд орлого нь орж ирэхгүй талаар мэдээлэл хүсэхээр мэдээлэл өгдөггүй, ТУЗ-өө хуралдуулдаггүй. Хамтарсан компани мөртлөө хууль зөрчиж байна.

Нийслэлийн хувьд 4.6 тэрбум төгрөгөө хувь, эзэмшилдээ нэмүүлэх байр суурьтай байгаа. Төв цэнгэлдэх хүрээлэн ХХК 200 гаруй сая төгрөгийн дүрмийн сантай. ТУЗ, хувь нийлүүлэгчдийн хурлаа хийж, шийдэхгүй бол шүүхэд хандана" гэж хэллээ.

зураг
 
зураг
 

Мэдээллийн дараа тэрбээр сэтгүүлчдийн асуултад хариуллаа.

-Орчин тойрныхоо газарт хяналтгүйгээр барилга барьсан тохиолдол олон байна гэлээ. Үүнд хяналт тавих агентлаг, газрын алба, өмчийн газрынхан юу хийсэн бэ?

-2005 оноос хойш хэний захирамжаар, хэзээ Төв цэнгэлдэхийн газрууд шилжиж байсан бүх мэдээлэл бидэнд бий. Төв цэнгэлдэх хүрээлэн ХХК бүх орлогоо авч, ачааг нь нийслэл үүрдэг. Энэ асуудлыг үеийн үед тавьж байсан ч авлига, албан тушаалын асуудал байдаг юм уу намжааж байсан. Тухайн үеийн албан тушаалтнууд болон хэн хэндээ буруу байгаа. 

  • Төв цэнгэлдэх хүрээлэн ХХК 2005 оноос хойш гурван удаа ногдол ашиг хуваарилсан байна.  2.5 сая, 6.5 сая, 2023 онд 18 сая төгрөгийг хуваарилж, нийт 30 орчим сая төгрөгийг нийслэлийн төсөвт төвлөрүүлсэн. Гэтэл нийслэлээс 4.6 тэрбум төгрөгийн хөрөнгө оруулалтыг хийсэн нь шударга бус.
  • Төв цэнгэлдэх хүрээлэн ХХК-ийн захирал Т.Нямдаваа Хотын даргатай уулзаагүй.
  • Газартай холбоотой ажлыг цэгцлэх ажил нүсэр. Хот төлөвлөлт, авлига, албан тушаалын суурь болж байгаа учраас шат дараатайгаар хийхээс өөр аргагүй.
  • Үндэсний Цэцэрлэгт Хүрээлэнгийн зөвшөөрөлгүй газрын асуудлыг шийдвэрлэнэ.
  • Хүй долоо худаг дахь Монгол наадам цогцолборт наадмаа тэмдэглэхгүй.
  • Төв цэнгэлдэхийн газарт нийслэл эзэн болно. Наадмаас өмнө өмчлөлийн асуудлаа иргэн Т.Нямдаваатай тохиролцож чадахгүй бол шүүхэд хандана.
  • Нийслэл Төв цэнгэлдэх хүрээлэнгийн 49%-ийн эзэмшлээ авах гэж үзээд өгөхгүй байгаа учир олон нийтэд нөхцөл байдлыг мэдэгдэхээс өөр аргагүйд хүрлээ.