Уншиж байна ...

Н.Баатарцогт: Тусгай хамгаалалттай бүсэд газар ашиглахтай холбоотой үйлчилгээг цахимаар авах боломжтой боллоо

Б.Билгүүн, iKon.mn
2024 оны 2 сарын 23
IKON.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Байгаль орчин, аялал жуулчлалын яамнаас цаг үеийн асуудлаар өнөөдөр мэдээлэл хийлээ.

Тусгай хамгаалалттай газар нутагт газар ашиглахтай холбоотой үйлчилгээг бүрэн цахимжуулж, иргэдэд e-mongolia.mn, аж ахуйн нэгжид www.e-business.mn системээр дамжуулан үзүүлж эхэлжээ. 
зураг
 
Гэрэл зургийг MPA агентлагийн онцгой зөвшөөрөлтэйгөөр ашиглав

Энэ талаар Тусгай хамгаалалттай газар нутгийн бодлого зохицуулалтын газрын дарга Н.Баатарцогт хэлэхдээ "Тусгай хамгаалалттай газар нутагт газар ашиглах эрхийн хугацаа сунгуулах, солбицол өөрчлүүлэх, эрхийг дуусгавар болгох хүсэлтийг цахимаар шийдвэрлүүлэх боломжтой болсон. 

Улсын хэмжээний 17 тусгай хамгаалалттай газар нутагт газар ашиглагч иргэн, хуулийн этгээдүүд газар ашиглахтай холбоотой үйлчилгээний хүсэлтээ цахимаар илгээж, хүсэлтийн явцыг хянах бүрэн боломжтой болж буй. 

Яамны Тусгай хамгаалалттай газар нутгийн бодлого зохицуулалтын газарт ирүүлсэн нийт өргөдөл, албан бичгийн 40 хувь нь зөвхөн газрын эрхийн хугацаа сунгуулах, солбицол өөрчлүүлэх, мөн газар ашиглах эрхийг хүчингүй болгуулах гээд газартай холбоотой үйлчилгээ авах хүсэлтүүд байдаг.

Иргэн, хуулийн этгээд өөрийн хүсэлтээ шийдвэрлүүлэхийн тулд 3-4 удаа хүсэлт гаргаж, 54-90 хоногийн хугацаа зарцуулдаг байсан юм. Цахимжуулснаар нэг удаа хүсэлт гаргаж, 30-40 хоногийн дотор бүрэн шийдвэрлүүлэх боломжтой болж байгаа. 

Гарах үр дүн: 

  • Төрийн хүнд суртал үгүй болж, авлига хээл хахууль үгүй болох
  • Төрийн байгууллагын уялдаа холбоо сайжрах
  • Баримт бичгийг давхардал арилж, хугацаа хэмнэх
  • Төр өөрт байгаа мэдээллээ иргэн, хуулийн этгээдээс авах шаардлагагүй болох
  • Цаасан архив багасаж, цахим архив үүсэх
  • Төрийн үйлчилгээний шат дамжлага буурч, шийдвэр гаргалтын явц ил тод, нээлттэй болох
  • Төрийн үйлчилгээний шат дамжлага хоёр дахин буурч, хүсэлтийн шийдвэрлэлтийн явцаа иргэн, хуулийн этгээд хянах боломжтой" гэлээ.

Тус яамны зүгээс мөн бусад үйлчилгээг цахимжуулах ажлыг хийхээр төлөвлөж байгаагаа мэдээллийн төгсгөлд онцолсон билээ.