Японы хойд эрэгт олон мянган тонн үхсэн загас далайн уснаас ил гарчээ

Японы хойд эрэг дагуу хэдэн мянган тонн хэмжээтэй үхсэн сардин загас далайн уснаас түрэгдэж гарсан тухай албаны эх сурвалж Баасан гарагт мэдээлжээ.

Пүрэв гарагийн өглөө тус улсын хамгийн хойд захын Хоккайдо арлын Хакодате хотын ойролцоо нэг километр орчим урт үргэлжилсэн эрэг дагуу ийм үзэгдэл анх ажиглагдсаныг мэдээлсэн байна.

Орон нутгийн иргэд ийм зүйл анх удаа тохиолдож байгааг хэвлэлд ярьжээ. Хотын захиргаа эрэгт хаягдсан загасыг хүнсэнд хэрэглэхгүй байхыг оршин суугчдад анхааруулсан байна.

Хакодате хотын Загасчлалын Судалгааны Хүрээлэнгийн мэргэжилтэн Такаши Фүжиока ийм үзэгдлийн талаар урьд өмнө нь сонсож байсан ч анх удаа нүдээр харж байгаагаа ярьжээ.

Сардин загаснууд том махчин загаснаас зугтахдаа хүч тэнхээгээ алдаж, хэт олуул бөөгнөрснөөс хүчилтөрөгчийн дутагдалд орсон байж болзошгүй гэж тэр тайлбарласан байна.

Бас нүүдэллэх замдаа гэнэтийн хүйтэн урсгалтай таарснаас цочролд орсон байх боломжтой гэжээ.

“Эдгээр загаснууд ямар учир шалтгаанаар эрэгт хаягдсаныг бид тодорхой хэлж мэдэхгүй байгаа тул хүнсэндээ хэрэглэхгүй байхыг зөвлөж байна” гэж Фүжиока орон нутгийн иргэдэд анхааруулсан байна.

Эх сурвалж: Associated Press