Украины тусгай алба Буриадын төмөр замыг хоёр дахь удаагаа дэлбэлжээ

Чёртовын гүүр

Лхагва гарагт ОХУ-ын Бүгд Найрамдах Буриад Улсын нутаг дэвсгэрээр дайран өнгөрдөг Байгал-Амарын төмөр зам дээр томоохон дэлбэрэлт болсныг бид өмнө нь мэдээлсэн билээ.

Дизель түлш тээвэрлэж явсан галт тэрэгний цуваанд тавьсан дөрвөн бөмбөг Оросын төмөр замын хамгийн урт хонгил болох 15 км урт Северомуйскийн хонгилд дэлбэрсэн юм.

Үүний улмаас Орос-Хятадын чиглэлд ачаа тээвэрлэдэг гол төмөр зам тасарсан байна.

Оросын мөрдөн байцаах албаныхан уг осолд терроризмын хэрэг үүсгэн шалгаж эхэлснээ мэдээлсэн юм. Мөн галт тэргийг өөр тойруу замаар явуулж эхэлснээ Оросын Төмөр Зам Нэгтгэлээс мэдээлж байв.

Тэгвэл Баасан гарагт төмөр замын энэ хэсэгт дахин дэлбэрэлт болж, өмнөх дэлбэрэлтийн дараа ашиглаж эхэлсэн тойруу зам эвдэрсэн байна.

Энэ удаа газраас 35 метр өндөр өргөгдсөн Чёртовын төмөр замын гүүр дэлбэрсэн тухай эх сурвалжууд мэдээлжээ.

Дараалсан хоёр дэлбэрэлтийг хоёуланг нь Украины аюулаас хамгаалах алба (СБУ) зохион байгуулснаа хүлээсэн байна.

“СБУ-ийн тавьсан урхинд Оросууд хоёр удаа орсноор Байгал-Амарын төмөр замаар зорчиж байсан бас нэг галт тэрэгний цуваа дэлбэрлээ. Манай хүмүүс хаа сайгүй байгааг Оросын тусгай албад ойлгох хэрэгтэй. Бүр алсын Буриадад ч байгаа. СБУ-ийн тооцоолсны дагуу галт тэрэг 35 метр өндөр гүүрээр өнгөрч байх үед бөмбөг дэлбэрсэн байна” гэж Украины аюулаас хамгаалах албаны эх сурвалж ярьжээ.

Энэ нь Украины тусгай албадын Оросын газар нутгийн хамгийн гүн хэсэгт явуулсан ажиллагаа болж байна. Буриадын БНУ нь Украины хилээс 4,000 орчим километр зайтай оршдог.

Байгал-Амарын төмөр замын шугамыг тасалснаар Хятад, Умард Солонгосын чиглэлийн ачаа тээвэрлэлтэд саад учирч байгаа юм байна.

Дараах газрын зураг дээр "Devil's Bridge" гэж англи хэлээр бичсэн нь Чёртовын гүүр юм. Тасархай шугамаар Северомуйскийн хонгилыг дүрсэлжээ.

 

Эх сурвалж: AFP