"Старлинк сервисес Монголиа ХХК-аас харилцаа холбооны чиглэлээр үйл ажиллагаа эрхлэх хүсэлтийг ХХЗХ-нд ирүүлээгүй"

Space X, Tesla компаниудын үүсгэн байгуулагч Илон Маск "Старлинк Сервисес" нэртэй бизнесийн зөвлөгөө, мэдээлэл технологийн чиглэлийн компанийг Монголд байгуулсан талаар бид өмнө нь мэдээлсэн.

Тус компанийн гүйцэтгэх захирлаар SpaceX компанийн хиймэл дагуулын холбоогоор дэлхийн өнцөг булан бүрд өндөр хурдтай интернэт үйлчилгээ үзүүлэх Starlink төслийн үйл ажиллагаа хариуцсан ахлах захирал Лорен Дрейертэй адил нэртэй хүн бүртгэлтэй байгаа юм.

Иймп тус компанийн үйл ажиллагаа эрхлэх зөвшөөрлийн талаар Харилцаа Холбооны Зохицуулах Хороо /ХХЗХ/-ноос тодруулахад "Старлинк компани, Старлинк Сервисес Монголиа ХХК-аас харилцаа холбооны чиглэлээр үйл ажиллагаа эрхлэх хүсэлтийг Харилцаа холбоо зохицуулах хороонд албан ёсоор ирүүлээгүй" гэв.

Түүнээс гадна "Улсын бүртгэлд бүртгэлтэй хуулийн этгээд нь харилцаа холбооны чиглэлээр үйл ажиллагаа явуулахдаа тодорхой нөхцөл шаардлагыг хангасны үндсэн дээр хорооноос тусгай зөвшөөрөл авдаг.

2021 оны жилийн эцсийн байдлаар манай улсад харилцаа холбооны чиглэлээр 639 аж ахуйн нэгж нийт 769 тусгай зөвшөөрөлтэй байна" гэдгийг хэллээ.