ЭТТ: Өөрийгөө ШАТААЛГҮЙГЭЭР эрх ашгаа хамгаалах бүрэн боломжтой байсан

Гэрэл зургийг Б.Бямба-Очир /mpa.mn/

"Эрдэнэс Таван Толгой" ХК-ийн Үйлдвэрчний эвлэлийн дарга С.Эрдэнэ өнөөдөр хэвлэлийн бага хурал хийж байх үеэрээ өөрийгөө шатаасантай холбоотойгоор ЭТТ компанийн удирдлагууд мэдээлэл хийлээ. 

ЭТТ компанийн Гадаад харилцаа Олон нийттэй харилцах хэлтсийн дарга н.Гэрэлтсансар "С.Эрдэнэ өөрийгөө шатаасан харамсалтай хэрэг болсныг хэвлэл мэдээллийн хэрэгслээс мэдлээ. Олон нийтийн газар олон хүнийг цочроосон, нөгөө талаар өөрийгөө хохироосон явдал болсонд харамсаж байна" гэв. 

"Эрдэнэс Таван Толгой" ХК-ийн тайлбар

2015 оны 11 сарын 13-ны өдөр “Эрдэнэс Таван Толгой” ХК-ийн “Эв санааны нэгдэл” үйлдвэрчний эвлэлээс цаг үеийн асуудлаар мэдээлэл хийхээр “Зууны мэдээ” сонины Үндэсний мэдээллийн төвд 12:00 цагаас хэвлэлийн бага хурал зарласан байна. 

Энэ үеэр мэдээлэл хийхээр ирсэн С.Эрдэнэ нь өөрийгөө шатаасан харамсалтай үйл явдал болсныг хэвлэл мэдээллийн хэрэгслээс олж мэдлээ. С.Эрдэнийн энэхүү үйлдэл нь олон нийтийн газар, олон хүнийг цочроосон нөгөө талаар өөрийгөө хохироосон явдал болсонд харамсаж байна. 

Тэрбээр энэхүү үйлдлээ хийхийн өмнө “Засгийн газраас манай компанийг дэмжихгүй ямагт дарж байна. Ажилчдын ар гэр өлсгөлөнд автлаа. Тиймээс би үр хүүхдийнхээ төлөө болон Монголын ард түмний өмнө өөрийгөө шатаалаа” гэж хэлээд шатаасан байна.

"Эрдэнэс Таван Толгой" ХХК Монгол Улсад мөрдөгдөж буй хууль тогтоомжийн хүрээнд үйл ажиллагаагаа явуулж байгаа бөгөөд хууль зөрчсөн үйл ажиллагаа явуулж байна гэж үзэж байгаа бол "Эв санааны нэгдэл" үйлдвэрчний эвлэлийн дарга нь холбогдох хууль тогтоомжийн дагуу холбогдох хууль тогтоомжийн дагуу өөрийгөө шатаалгүйгээр эрх ашгаа хамгаалах бүрэн боломжтой байсан. 

Өөрөөр хэлбэл эрх ашиг нь зөрчигдсөн гэж үзэж байгаа бол шүүхэд хандаж, асуудлаа шийдвэрлүүлэх бүрэн боломжтой юм.

Энэ тухай Иргэний хууль, Хөдөлмөрийн тухай хууль болон бусад хуульд заасны дагуу шүүхэд хандан зөрчигдсөн эрхээ сэргээлгэхээр нэхэмжлэл гаргах эрх нь нээлттэй. Гэвч тэрбээр энэхүү хуулийн боломжийг бус харин эрүүл мэндээрээ хохирч нийгэмд айдас төрүүлэхүйц үйлдлийг сонгосонд харамсаж байна. Тиймээс болсон үйл явдлыг зохих хуулийн байгууллага шалгаж, үнэн мөнийг тогтоох биз ээ.

Гэрэл зургийг Б.Бямба-Очир

ЭТТ компанийн зүгээс хийсэн мэдэгдлийн дараа тус компанийн ажилчид "Гэрээний талаар тайлбар хий. Та нар огцор" хэмээн шаардаж ээлжийн мастер Б.Түмэнбаяр мэдээлэл хийлээ.

Тэрбээр “ЭТТ компани 2011 онд Австралийн компанитай гэрээ байгуулж олборлолт хийж эхэлсэн. Ингээд 2015 онд гэрээгээ цуцалж Сингапурт төвтэй Хятадын компанитай гэрээ байгуулж, ажилчдыг шилжүүлэх болсон. Энэ гэрээний хоёр заалт ажилчдын эрхийг ноцтой зөрчиж байгаа. 

 С.Эрдэнээ ахыг тийм үйлдэл хийх гэж байгааг огт мэдээгүй. 

“Эв санааны нэгдэл” үйлдвэрчний эвлэлийн холбоог төлөөлж С.Эрдэнээ ах МУ-ын Ерөнхийлөгч, Ерөнхий сайд, ЗГХЭГ-ын дарга С.Баярцогт, Шударга шүүх ТББ гээд олон байгууллага, хүмүүст хандсан ч хариу ирэхгүй, үр дүнд хүрэхгүй байсан учраас өнөөдрийн байдалд хүрлээ. 

С.Эрдэнээ ахын бэлтгэсэн хэвлэлийн мэдээнээс ямар байдалд орсныг нь харж болно. Бидний зүгээс С.Эрдэнээ ахыг тийм үйлдэл хийх гэж байгааг огт мэдээгүй. Хэвлэлийн бага хуралд хамт оролцсон хүмүүс одоо СБД-ийн цагдаагийн хэлтэс дээр байцаагдаж байгаа. 

Дээрх үйл явдлын дараа уурхай  дээр ажиллаж байсан бусад ажилтнууд бидэнтэй санал нэгтэй байгаагаа мэдэгдэж өнөөдрийн 16:00 цагаас эхлэн ажил хаяж, уурхайн ажил бүрэн зогссон” гэлээ.