Б.Нямдагва: Толгойтыг Ард Аюушийн өргөн чөлөөтэй холбох эхний ээлжийн 2.4 километр замын хөдөлгөөнийг зургаадугаар сарын сүүлчээр нээнэ

Нэгдүгээр хорооллын хойд талыг "Содон" хороололтой холбох 3.9 километр авто замын эхний ээлжийн 2.4 километр замын хучилтын ажил эхэлжээ. Уг авто зам, гүүрэн байгууламж ашиглалтад орсноор Энхтайвны өргөн чөлөөний замын баруун хэсгийн ачааллыг 30-50 хувиар хуваалцана гэж тооцоолсон байна.

Авто замын бүтээн байгуулалтын ажлын явцын талаар “Монгол зам групп” ХХК-ийн ерөнхий инженер Б.Нямдагва "Толгойтын замыг Ард Аюушийн өргөн чөлөөтэй холбох 3.9 километр авто замын бүтээн байгуулалт 58%-тай үргэлжилж байна. Цементээр бэхжүүлсэн суурь болон замын бродюр суурилуулах, гүүр, туннель, ус зайлуулах хоолой болон хиймэл байгууламжуудыг барих ажил 80%-д хүрсэн.

Өнөөдрийн байдлаар эхний ээлжийн 2.4 километр замын асфальбетон хучилтыг тавьж байгаа юм. Замын нэгдүгээр эгнээний хучилт дууссаны дараа хоёрдугаар эгнээний хучилтыг гүйцэтгэнэ. Нэгдүгээр хэсгийн буюу 2.4 километр энэхүү замын хөдөлгөөнийг зургаадугаар сарын сүүлчээр нээнэ.

Харин Ард Аюуш талын 1.5 километр замд инженерийн шугам сүлжээний өөрчлөлтөөс шалтгаалж хугацаа алдаж байгаа ч шахаж ажиллахаар төлөвлөсөн.

Уг зам нь нэгдүгээр ангиллын зам учраас орц, гарцгүй. Оршин суугчдын зүгээс замыг орц, гарцтай болгох хүсэлт гаргасныг захиалагч байгууллагад уламжлахад боломжтой хувилбараар шийдэх гаргалгааг танилцуулна гэдгээ мэдэгдээд байна" гэж мэдээллээ.

Толгойтын замыг Ард Аюушийн өргөн чөлөөтэй холбох 3.9 километр зам нь зургаан эгнээ, замын хоёр талаар тус бүр гурван метрийн өргөн явган хүний замтай, гэрлэн дохиогоор зохицуулагдах юм байна.

Авто замын талбай дээр 70-80 хүн ажиллаж байгаа аж.