Йеменд довтлох байлдааны нууц төлөвлөгөөг Пентагоны тэргүүн бас нэг чат группт задалсан нь тодорхой болжээ

АНУ-ын батлан хамгаалахын сайд Пит Хэгсэт

Гуравдугаар сард Ираны холбоотон Йемений зэвсэгт босогчдод агаараас довтлох байлдааны нууц төлөвлөгөөг Пентагоны тэргүүн бусад албан тушаалтнуудтай хуваалцахдаа энгийн мессенжэрт үүсгэсэн чат групп ашиглаж байгаад нэг сэтгүүлчид задруулсан нь ил болсон билээ.

Тэгвэл АНУ-ын батлан хамгаалахын сайд Пит Хэгсэт уг нууц төлөвлөгөөг өөрийн гэргий, ах, хувийн өмгөөлөгч нарыг багтаасан бас нэг чат группт нийтэлсэн нь илэрснийг уг асуудлыг шалгаж буй албаны эх сурвалж мэдээлжээ.

Хэгсэт болон бусад өндөр албан тушаалтнууд хоорондоо харилцахдаа ямар ч нууцлалгүй, арилжааны зориулалттай Signal мессенжэр платформыг ашиглаж байсан нь асуудал үүсгээд байгаа юм.

Пентагон одоо уг асуудлыг дотооддоо мөрдөн шалгаж байгаа бөгөөд өнгөрсөн долоо хоногт үүнтэй холбоотой зарим албан тушаалтнууд ажлаасаа халагдсан байна.

Эхний удаад АНУ-ын аюулгүй байдлын асуудал хариуцсан өндөр албан тушаалтнуудын чат группт санамсаргүй тохиолдлоор нэгдсэн “The Atlantic” сэтгүүлийн эрхлэгч Жэфри Голдбэрг байлдааны нууц төлөвлөгөөг хүлээн авсан юм.

Харин хоёр дахь чат группт Пит Хэгсэтийн гэр бүлийнхэн голдуу арав гаруй хүн байсныг нэрээ нууцалсан албаны эх сурвалж Ням гарагт мэдээлсэн байна.

Хэгсэтийн гэргий Женнифер өмнө нь Fox News сувгийн продюсер байсан хүн бөгөөд өнгөрсөн сард нөхрөө Их Британийн батлан хамгаалахын сайдтай Пентагонд уулзахад хамт байсан нь хэвлэлийн гэрэл зургаас ил болж байв.

Хэгсэтийн задруулсан мэдээлэлд Йемений босогчдын ямар ямар байрлалуудад хэзээ, ямар зэвсгээр довтлох нарийвчилсан төлөвлөгөө байжээ.

Энэхүү асуудал Трампын засаг захиргааг ичгүүртэй байдалд оруулаад байгаа ч Цагаан ордон үүнд аль болох ач холбогдол өгөхгүй өнгөрөөхийг хичээж байгаа.

Ардчилсан Намын улс төрчид Fox News сувгийн хөтлөгч асан Пит Хэгсэтийг албан тушаалдаа тэнцэхгүй хүн гэж үзэж байна.

“Пит Хэгсэт олон хүний амь насыг эрсдэлд оруулж буйг бид харсаар сууна. Гэвч Трамп түүнийг халах чадваргүй байна. Хэгсэт огцрох ёстой” гэж Сенатын танхимын цөөнхийн бүлгийн дарга Чак Шумер сошиал хуудсандаа бичжээ.

Иракийн дайны ахмад дайчин, 2004 онд тулаанд хүнд шархдаж байсан сенатор Тамми Дакворт “гутамшигтайгаар огцрох ёстой хүн” гэж Хэгсэтийг дүгнэсэн байна.

Эх сурвалж: Reuters