Б.Загдсамбар: Хан-Уул дүүргийн 23 дугаар хороо, Яармагт сургууль, цэцэрлэгийн газар олгогдоогүй

Гэрэл зургийг MPA агентлагийн онцгой зөвшөөрөлтэйгөөр ашиглав

Нийслэлийн ИТХ-ын ээлжит XXIII дугаар хуралдаан өнөөдөр/2024.09.19/ болж байна.

Нийслэлийн 2024 оны төсөвт нэмэлт өөрчлөлт оруулах тухай, газар зохион байгуулалтын төлөвлөгөөнд нэмэлт өөрчлөлт оруулах, нийтийн эдэлбэр газрын байршил, хэмжээг тогтоох тухай, гэр хорооллыг орон сууцжуулах байршил, хэмжээ, хил заагийг тогтоох, “Эко хороолол ба орлогод нийцсэн орон сууцны санд хөрөнгө оруулах тухай, Улаанбаатар хот, Төв аймгийн орон нутгийн өмчит “Шинэ Зуунмод хотын хөгжлийн корпорац байгуулах тухай болон бусад асуудлыг төлөөлөгчид хэлэлцэхээр төлөвлөжээ.

Хуралдааны танхимаас мэдээллийг хүргэж байна.

Нийслэлийн Засаг Даргын Тамгын газрынхан бүрэн бүрэлдэхүүнээрээ Хан-Уул дүүргийн 23 дугаар хорооны нутаг дэвсгэр дэх Яармаг дахь Хангарди ордонд нүүж ороод буй. Харин уг байршилд сургууль, цэцэрлэг байхгүй.

Энэ талаар НИТХ-ын төлөөлөгч Л.Отгонбаатар "Хан-Уул дүүргийн 23 дугаар хорооны нутаг дэвсгэр буюу бидний нүүж ирсэн Нийслэлийн Засаг Даргын Тамгын газрын шинэ байрны орчимд сүүлийн таван жилийн хугацаанд барилга их баригдсан. Одоо ч орон сууцны хороолол барьж байна. Гэтэл  улсын сургууль, цэцэрлэг, эмнэлэг алга. Хот байгуулалтын асуудал хариуцсан байгууллагууд сургууль, цэцэрлэг төлөвлөхгүйгээр орон сууцны хороолол барихыг зөвшөөрсөн нь алдаа. Энд нүүж ирсэн орон сууцны иргэд хохирч байна. Яармаг өглөө, орой, өдөр шөнөгүй түгжирдэг боллоо. 2024 оны төсөвт тус хороонд сургууль, цэцэрлэг барих төсөв тусгагдсан. Газрын асуудал шийдэгдсэн үү?, шийдсэн бол барилгын ажил эхлэх үү? гэж асуулаа.

Нийслэлийн Газар зохион байгуулалтын албаны Кадастрын хэлтсийн дарга Б.Загдсамбар "Хан-Уул дүүргийн 24 дүгээр хорооны замын хойд хэсэг Улаанбаатар хотоос, замын урд талын газар Байгаль Орчны Яамны сайдын тушаалаар олгогдож байгаа юм.

Өнгөрсөн хугацаанд Хан-Уул дүүргийн 24 дүгээр хорооны замын хойд хоёр цэцэрлэг, нэг сургуулийн газрыг чөлөөлж, сургууль нь баригдсан. 14 хоногийн өмнө орц, гарцыг чөлөөлсөн байдалтай байна. Дэргэд нь нэг сургууль, нэг цэцэрлэгийн газрын эрх олгосон ч өмнө нь эзэмшиж байсан компани шүүхэд хандаж түдгэлзүүлсэн. 23 дугаар хороонд сургууль, цэцэрлэгийн газар олгогдоогүй".

Нийслэлийн хөрөнгө оруулалтын газрын дарга С.Цэдэнсодном "Хан-Уул дүүргийн 23 дугаар хороонд цэцэрлэгийн барилга худалдаж авахаар тендер зарлагдаад, гэрээ нь байгуулагдаж байна. Цэцэрлэг нь зургаан бүлэгтэй байх юм. 960 хүүхэд хүлээн авах хүчин чадалтай сургуулийн барилгын ажил эхэлж, хоёрдугаар давхар хүртэл барьж байна. Уг сургуулийн газар нь төсөл хэрэгжүүлж буй байгууллагынх" гэв.

НИТХ-ын хуралдаан нийтийн эдэлбэр газрын байршил, хэмжээг тогтоох тухай асуудлаар үргэлжилж байна.