Г.Баярсайхан: Найрамдал зуслангийн замыг засах тендерт шалгарсан компани бэлтгэлээ хангачихсан байтал өөр ААН гомдол гаргасан

Гэрэл зургийг MPA агентлагийн онцгой зөвшөөрөлтэйгөөр ашиглав

Олон улсын хүүхдийн Найрамдал зуслангийн авто замыг 1978 онд ашиглалтад оруулснаас хойш шинэчлэл хийгээгүй бөгөөд Тахилтын уулзвараас уг зуслан хүртэлх 15.7км замыг шинэчлэх ажлыг 22 орчим тэрбум төгрөгөөр хийхээр болж, тендер зарласан болохыг албаныхан долдугаар сард мэдээлж байв. Гэвч зам засварын ажил эхлээгүй байна. Энэ нь ямар учиртайг Нийслэлийн Замын Хөгжлийн Газрын/НЗХГ/ удирдах албан тушаалтнаас тодруулав.

НЗХГ-ын дарга Г.Баярсайхан "Найрамдал зуслангийн замыг засах тендерт "Тотал Инж" компани шалгарсан юм. Гэтэл "Макс рөүд" компаниас гомдол гаргаад байна. Тус компани нь долдугаарт жагссан мөртлөө тендерт шалгарсан компанийн талаарх гомдлыг Сангийн яаманд гаргасан байсан.

Сангийн яаманд тендерийн шалгаруулалтыг хэрхэн хийсэн талаарх үндэслэл, бичиг баримтаа хүргүүлсэн байгаа. Тендерийн сонгон шалгаруулалтыг хуулийн дагуу явуулсан, бид хийсэн ажилдаа эзэн болно.

Яамнаас ажлаа үргэлжлүүлэх тухай албан бичиг ирвэл Найрамдал зуслангийн замыг шинэчлэх ажил эхэлнэ. Хүйтний улирал эхлэхээс өмнө ажлаа алдмааргүй байгаа тухай шаардлагыг Сангийн яаманд тавиад байгаа. Уг нь тендерт шалгарсан компани зам засвар, шинэчлэлийн ажлаа гүйцэтгэх бэлтгэлээ хангачихсан байтал маргаан гарсан юм. 

Найрамдал зуслангийн замыг шинэчлэхдээ нөхөөсний тэгш байдлыг хангаж, суурь хучилт хийнэ. Зам засварын ажил эхэлчихвэл Баянголын аманд түгжрэл нөлөөлөх нь бага тул 10 дугаар сарын 1-нээс өмнө дуусгана.

Тус зуслангийн захирал Б.Отгонбатын зүгээс зам засвар, шинэчлэлийг хурдан хийх шаардлагыг бидэнд тавиад байгаа" гэсэн мэдээллийг өглөө.