З.Мэндсайхан: Би шүдлэнгийн аман хүзүүгээ авна. Комисс шийдвэрээ эргэж харах байх
Үндэсний их баяр наадмын шүдлэн насны морьдын уралдаан өчигдөр Хүй долоо худагт болсон.
Энэхүү уралдаанд түрүүлж явсан үрээг морь бариач хааж давхисаар ХХААХҮ-ийн сайд асан З.Мэндсайханы шарга үрээ түрүүллээ гэх шүүмжлэл олон нийтийн сүлжээнд өрнөж байна.
Шударга бус шүүлт байсан талаарх олны шүүмжлэлд ХХААХҮ-ийн сайд асан З.Мэндсайхан цахим хуудсаараа дамжуулан дараах тайлбарыг бичжээ.
Тэрбээр "Би шүдлэнгийн аман хүзүүгээ авна аа, түрүү энэ хар үрээ, комисс шийдвэрээ эргэж харах байхаа. Дундговь аймгийн Луус сумын уяач Э.Улаанхүүдээ төрийн наадмын олон түрүү аваарай гэж ерөөе, хүлэг нь хурдан байг ээ" гэжээ.
Харин шадар сайд С.Амарсайхан "Тулгар төрийн 2232, Их Монгол Улс байгуулагдсаны 817, Үндэсний эрх чөлөө, Тусгаар тогтнолоо сэргээн мандуулсны 112, Ардын хувьсгалын 102 жилийн ойн Үндэсний их баяр наадмын шүдлэн насны уралдаанд морь бариачийн алдаатай үйл ажиллагаанаас болж, будилаан үүссэн.
Тодруулбал шүдлэн насны морьдын уралдаанд Ховд аймгийн Мянгат сумын харьяат З.Мэндсайханы шарга халзан түрүүлсэн гэж байгаа ч маргаан дагуулаад байгаа морьд түрүү болон аман хүзүүнд орж ирэх явцад морь бариач өмнүүр нь орж будилаантуулсан тул дахин нягталж, шударгаар шийдэх, ёс зүйгүй үйлдэл гаргаж уралдааныг будилаантуулсан бариачид хариуцлага тооцож, шүдлэн насны уралдаанд аман хүзүүдсэн Дундговь аймгийн Дуут сумын харьяат хар шүдлэнг түрүүлүүлж, шарга халзан үрээг аман хүзүүдүүлэх үүргийг Хурдан морины салбар хорооны дарга Д.Ганхуягт үүрэг болголоо" гэсэн байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
