"Гандантэгчэнлин хийдийн асуудлаар ярилцлага өгсөн хүүхэд нийгэмд гадуурхагдаж байна"

Гэрэл зургийг MPA агентлагийн онцгой зөвшөөрөлтэйгөөр ашиглав

МБШТөв-Гандантэгчэнлин хийдээс нийгэмд үүсээд буй нөхцөл байдлын талаар өнөөдөр хэвлэлийн хурал зохион байгуулж байна.

Сүм, хийдэд ламхай нар бэлгийн хүчирхийлэлд өртсөн байж болзошгүй гэх мэдээллийн дагуу Баянгол дүүргийн цагдаагийн газраас мөрдөн шалгах ажиллагаа явуулж байгааг мэдээлээд буй. Уг асуудлын талаар Гандантэгчэнлин хийдээс олон нийтэд мэдээлэл өгч байна.

"Гандан" ТВ-ийн тэргүүн Ж.Одгарьд "Үндсэн хуульд заасны дагуу шүүхээр гэм буруутай нь тогтоогдоогүй тохиолдолд хэн нэгнийг буруутай мэтээр ярьж болохгүй.

Нэр бүхий сайтад нийтлэгдсэн мэдээллийн дагуу шалгуулах хүсэлтээ цагдаагийн байгууллагад хүргүүлсэн. Шалгалтын ажиллагаа явагдаж байгаа тул тодорхой мэдээлэл өгөх боломжгүй байна.

Шүүхээс гэм буруутай нь тогтоогдоогүй байхад олон нийтийн сүлжээгээр буруутгах нь хэрээс хэтэрлээ.

Нэр бүхий улс төрчид ч энэ талаар ярьж байгаа нь зохисгүй.

Нийгэмд үүссэн нөхцөл байдалд цочирдож байна. Энэ асуудлыг ярихад ч эвгүй. Лам хуврагууд, хийдийг олон нийтээрээ гутаасанд харамсаж байна. Үнэн зөвийг хуулийн байгууллага шийдэх болно. Шүүхээр буруутай нь тогтоогдоогүй байхад нэрийг зарлаж байгаад харамсаж байна. Бид хүүхдийн эрхийн төлөө ажиллана" гэв.

Гандантэгчэнлин хийд тамгын лам н.Сайнсүлд "Нийгэмд үүссэн нөхцөл байдал урд өмнө нь Гандантэгчинлэн хийдэд гарч байгаагүй. Гандантэгчинлэн хийд дотооддоо холбогдох газруудтай хамтран уг нөхцөл байдлын талаар хариу арга хэмжээ авч байна".

Гандантэгчэнлин хийдийн нийгэм, олон нийт хариуцсан тэргүүлэгч н.Мөнхбаатар "Ярилцлага хийж, тодорхой хүүхдүүдийн нэрийг олон нийтэд зарласан нь хүүхдийн эрхэд халдсан харамсалтай явдал болсон. Ярилцлага өгсөн хүүхдүүд нийгэмд гадуурхагдаж байна. Монголд болон Энэтхэгт сурч байгаа хүүхдүүдийг гутаан доромжилж байгаа асуудал гарч байна. Хүүхдийн эрхийг хамгаалахад хамтарч ажиллаасай гэж хүсэж байна. Энэ хэргийг үнэн зөвөөр нь шийдвэрлүүлэхийг зорих ёстой" хэмээн ярилаа.

Гандантэгчэнлин хийдийн цорж лам Б.Чойжилсүрэн "Хүүхдийн бэлгийн хүчирхийллийн асуудал буддын шашинд байдаггүй зүйл. 1990 оноос хойш энэ хийдэд шавилан сууж байх хугацаанд энэ асуудал гарч байгаагүй.

Төрийн албан тушаалтнууд энэ асуудлаар байр сууриа илэрхийлж байгаа нь болчимгүй үйлдлүүдийг гаргаж байна.

Монголын бурхны шашны өөрсдийн жаяг гэж бий. Жаягт олон төрлийн сахил байдаг. Энэ дотроос хамгийн доод түвшний сахил бий. Энэ сахилд эхнэртэй байж болно, өөрийн эхнэр хүнтэй бэлгийн харьцаанд орж болохыг зөвшөөрдөг. Гэхдээ эмэгтэй хүнтэй зүй бусаар бэлгийн харилцаанд орж болохгүйг заадаг. Эрэгтэй хүнтэй бүр болохгүй. Хэрэв ийм зүйл байвал гаж үзэгдэл. Энэ санваарыг сахих ам тангаргаа өгдөг. Хүсэл тачаалыг хорихын тулд явдаг тул нийгэмд яригдаад буй үйлдэл байхгүйг хэлье" хэмээн тайлбарлав.

"Гандан" ТВ-ийн тэргүүн Ж.Одгарьд "1990 оноос өнөөдрийг хүртэл энэ төрлийн гэмт хэрэг бүртгэгдсэн эсэхийг Баянгол дүүргийн цагдаагийн байгууллагаас очиж тодруулахад ийм зүйл болоогүй байна. Хэрэг үйлдэгдсэн мэт зохион байгуулалттайгаар дайрч доромжилж байна. Нэр бүхий улс төрчид уучлал гуйхыг шаардаж байна" хэмээн хэллээ.

ШУУД ҮЗЭХ: