Э.Одбаяр: Л.Оюун-Эрдэнэ МАН-ын дарга, Ерөнхий сайд, Монгол Улсын иргэн гэсэн гурван статусаар шүүхэд гомдол гаргасан

Гэрэл зургийг mpa.mn

Өнгөрсөн Баасан гарагт БГД-ийн Эрүүгийн хэргийн анхан шатны шүүхэд эхэлсэн иргэн Э.Одбаяр нарын таван хүнд холбогдох эрүүгийн хэргийн шүүх хуралдаан үргэлжилж байна.

Одоогоор шүүх хурал түр завсарлаад байгаа бөгөөд энэ талаар иргэн Э.Одбаяраас тодруулж, мэдээлэл авлаа.

Тэрбээр "Одоогоор NoWar хөдөлгөөний таван хүнд холбогдуулж эрүүгийн хоёр хэрэг, 10 хүнд зургаан зөрчлийн хэрэг үүсээд байгаа. Өнөөдөр хоёр эрүүгийн хэрэгтэй холбогдох шүүх хурал болж байна.  Тус шүүх хуралд нийт долоон хүн хохирогчоор оролцож байна.

Хоёр эрүүгийн хэргийн нэг нь цахим үндэстэн буюу NoDoubleStandart-тай холбоотой бол нөгөөх нь биднийг 461 дүгээр ангиас хүн оргуулж байх явцдаа хууль сахиулагч нарыг эсэргүүцсэн гэх үндэслэлээр үүсгэсэн. Гэтэл оргосон гэх хүн нь оргоогүй гэдэг нь тогтоогдоод хэрэгсэхгүй болоод удаж байна.

Өөрөөр хэлбэл, оргосон гэдэг нь огт тогтоогдоогүй, хэрэгсэхгүй болсон хэрэг дээр шүүж байна гэхэд хилсдэхгүй" гэв.

Үргэлжлүүлэн "Мөн Дорнод аймагт хүүхэд машин дайруулсан видео бичлэгийг ил болгохдоо МАН-ын гишүүдийн нэр хүндэд намайг халдсан гэж үзэж байгаа. Уг нь тухайн хэргийн бичлэг устаад байсан, дарагдах гээд байсан болохоор тус аймгийн иргэн намайг шүгэл үлээхийг хүссэн учраас би өөрийн цахим хаягтаа нийтэлсэн. Тэр бичлэгийг одоо хүртэл устгаагүй учраас бас асуудал үүсээд байгаа" гэдгийг нэмж хэлсэн юм.

Бид тус шүүх хурлын шийдвэрийн талаар эргэн мэдээлэх болно.