Уншиж байна ...
Зураг
Зураг
ХУУЧИРСАН МЭДЭЭ: 2022/06/20-НД НИЙТЛЭГДСЭН

"Сурагчдын 70% нь өглөө хичээлдээ хоосон ходоодтой ирдэг. Цаашид V-IX ангийнхныг Үдийн хоол хөтөлбөрт хамруулах боломжтой"

Б.Бадамгарав, IKon.mn
2022 оны 6 сарын 20
iKon.MN
Зураг зураг

Боловсролын салбарынхан өнөөдөр 2021-2022 оны хичээлийн жилийн нэгдсэн хурлаа хийж байна.

Хурлын эхэнд Боловсрол, шинжлэх ухааны сайд Л.Энх-Амгалан ерөнхий мэдээллийг танилцуулав.

Тэрбээр өнгөрөн одож буй энэ хичээлийн жилд танхимын сургалтыг эхлүүлсэн нь тун оновчтой шийдвэр байсныг онцолсон юм.

Түүнчлэн "Цар тахлын улмаас сургалтын хоцрогдол ихээхэн гарсан. Гэхдээ амжилттай нөхөж буй сайн жишээнүүд бий. Жишээлбэл, suraad.mn платформын үүсгэн байгуулагч Э.Энхпүрэв сүүлийн жилүүдэд Элсэлтийн Ерөнхий Шалгалтад улсдаа хамгийн бага оноо авсан 42 сургуулийн нийт 12,000 сурагчийг математикийн хичээлийн хоцрогдлыг нөхсөн.

Заримдаа есдүгээр ангийн хүүхдүүд гуравдугаар ангийн хичээлээ эргэн үзэж, нөхөж байж буцаад есдүгээр ангидаа ирвэл сайжирдаг юм байна гэдгийг Э.Энхпүрэв багш хэлж байв. Хүүхдүүд тухайн үедээ хоцорчихвол цаашид сурах эрмэлзэл нь буурах хандлагатай болдог. Иймд тухай тухайн үед нь хичээлийг нь нөхөх, бататгах шаардлагатай.

Үүний зэрэгцээ цахим платформуудыг хөгжүүлэх нь чухал. Тухайлбал, medle.mn бол хаана сурч, ажиллаж байгаагаас үл хамааран хамгийн сайн багшийн хичээлийг үзэх боломжтой. Цаашид виртуаль сургууль болгоно" гэлээ. medle.mn виртуаль сургууль болсноор сурагчид бүртгүүлж, хүссэн хичээлээ сонгон судлах боломжтой болох аж.

Харин Үдийн хоол хөтөлбөрийн тухайд сайд Л.Энх-Амгалан "Сурагчдын 70 хувь нь өглөө хоосон ходоодтой хичээлдээ ирдэг. Хоосон ходоодтой хүүхдийг тархи ажилладаггүй, сурах идэвх бага байдаг. Үдийн хоол хөтөлбөрийг Эрүүл мэнд, Иргэний боловсрол, Биеийн тамир зэрэг хичээлтэй интаграцид оруулж, эрүүл зөв амьдралын хэв маягийн дадал хэвшлийг олгож болохоор байна. Цаашид 5-9 дүгээр ангийн хүүхдүүдийг Үдийн хоол хөтөлбөрт оролцуулах боломжтой гэж үзэж байгаа" гэв.

Ирэх жил үнэлгээний тогтолцоог төгөлдөржүүлэхэд анхаарах, цахим шилжилтийг гүнзгийрүүлэх, Үдийн хоол, сургууль бүрд сэтгэл зүйч ажиллуулах зэрэг хөтөлбөрүүдээ үргэлжлүүлэх зэрэг зорилтоо танилцууллаа.

ВИДЕО:

https://www.facebook.com/MinistryofEdu/videos/1874038486128949