Ё.Баатарбилэг: Би буруугүй
УИХ-ын гишүүний халдашгүй байдлын дэд хорооны хуралдаан үргэлжилж байна. Тус хуралдаанаар нэр бүхий УИХ-ын гишүүдийн бүрэн эрхийг түдгэлзүүлэх асуудлыг хэлэлцэж байгаа билээ.
Н.Алтанхуяг, Г.Амартүвшин нарын дараа нэрсийн дарааллаар Ё.Баатарбилэг гишүүн дэд хорооны хуралд оров. Тэрбээр хурлаас гарч ирээд дараах тайлбарыг өглөө.
УИХ-ын гишүүн Ё.Баатарбилэг “Хуулийн халдашгүй байдлын дэд хорооны хуралд орлоо. Намайг хуулийн байгууллагаас Хөгжлийн Банкнаас зээл авсан компанитай холбогдуулж, авлига албан тушаалын гэмт хэрэгт буруутгаж байгаа юм байна. Би дэд хорооны гишүүдэд тайлбар, мэдүүлэг өглөө.
Хуурай гүжир хариу үгүй гэдэг. Би буруугүй” гэлээ.
Ё.Баатарбилэг гишүүн бусдаас хахууль авсан гэх хэрэгт холбогдсоныг албаны эх сурвалж хэлсэн. Тодруулбал, Хөгжлийн Банкнаас зээл аваад өдгөө чанаргүй зээлдэгчийн тоонд ороод буй НВЦ компанийн захирал Ц.Баатарбилэгээс их хэмжээний хахууль авсан нөхцөл байдал тогтоогдсон учир түүнийг яллагдагчаар татжээ.
Үргэлжлүүлэн УЕП-оос бүрэн эрхийг нь түдгэлзүүлэх санал гаргасан дөрвөн гишүүний хамгийн сүүлийнх болох Х.Ганхуяг гишүүний асуудлыг халдашгүй байдлын дэд хороогоор хэлэлцэж байна.
