Үндэсний бөхийн аварга Н.Батсуурийг спорт хорооны даргаас чөлөөлнө гэв

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын Эдийн засгийн байнгын хорооны өчигдрийн хуралдаанаар Засгийн газраас өргөн мэдүүлсэн Төрийн хэмнэлтийн тухай хуулийн төслийг хэлэлцэв.

Тус хуулийн 15.1.8-д үндсэн чиг үүрэгт хамаарахаас бусад тохиолдолд спорт, урлагийн арга хэмжээ, баг, тамирчин, урлаг соёлын хамтлаг, дуучин ивээн тэтгэх, цалин хөлс олгох, сургалтын төлбөр санхүүжүүлэх, хөдөлмөрийн дотоод журам заагаагүй хандив, тусламж, дэмжлэг өгөхийг төрийн байгууллагуудад хоригложээ.

Уг заалттай холбогдуулан УИХ-ын гишүүн Б.Энхбаяр асуулт асуув.

Тэрбээр “Тамирчин, урлаг соёлын хамтлаг байлгахын хориглож байна гэж ойлгож болох уу. Шууд асуухад энэ заалт батлагдсан тохиолдолд яамдын дэргэд спорт хороод татан буугдах уу. Цагдаагийн “Хүч” нийгэмлэг, Батлан хамгаалах яамны дэргэдэх “Алдар” спорт хороо, ОБЕГ-ын дэргэдэх “Аврагч” спорт хороо байдаг. Эдгээр хороог татан буулгаж байна гэж ойлгож байна. Мөн Цэргийн дуу бүжгийн чуулга, Хилийн цэргийн чуулга, ЦЕГ-ын дэргэдэх “Сүлд” чуулга татан буугдах уу” гэв.

Түүний асуултад Сангийн яамны Төрийн нарийн бичгийн дарга Ж.Ганбат: Энэ асуудлыг Засгийн газрын түвшинд нэлээд ярьсан. Спортын хороодыг тусгай хүчний байгууллагуудын бэлтгэлд зориулан байгуулсан. Үндсэн алба хаагч биш бол тамирчдыг энд байлгах нь буруу юм. Тиймээс спорт хороодыг Биеийн тамир, спортын хороонд нэгтгэх зохион байгуулах нь зөв гэж үзсэн. Мөн чуулгуудыг Соёлын яаманд нэгтгэн зохион байгуулна. Эдгээр асуудлыг 2023 оны төсөвт авч үзнэ.  Тамирчид хүчний байгууллагын орон тоонд орж ажиллаад байдаг. Гэтэл тэр тамирчид хамгаалалтад гарч зогсдог уу үгүй юу гэдэг асуудал бий.

УИХ-ын гишүүн Б.Энхбаяр: Дээрх байгууллагуудыг татан буулгах уу, нэгтгэх үү гэдэгт тодорхой хариулт өгөөч. Цагдаагийн “Сүлд” чуулга, “Алдар” спорт хороо татан буугдах уу. Н.Батсуурь аварга “Сүлд” спорт хорооны дарга юм байна. Тэгвэл энэ хууль батлагдсанаар аварга ажлаа өгөх үү гэдгийг асууя.

Сангийн яамны Төрийн нарийн бичгийн дарга Ж.Ганбат: Хилийн цэргийн дуу бүжгийн чуулга, “Сүлд” чуулга бүгд Соёлын яамны харьяанд очно. “Алдар” спорт хорооны тамирчид Биеийн тамир спортын хороонд шилжинэ.

Н.Батсуурь аваргын хувьд Биеийн тамир спортын хороо руу шилжиж таарна. Спорт хороонд зөвхөн хүчний байгууллагын алба хаагчдыг үлдээгээд, тамирчдыг шилжүүлнэ.