Гэрэл зургийг Mpa.mn

Монгол Улсын Засгийн газрын ээлжит бус хуралдаан боллоо. 

Хуралдаанаас гарсан шийдвэрийг Ерөнхий сайд Л.Оюун-Эрдэнэ болон сайд нар танилцуулж байна.

Тэрбээр "Төсөвт байгууллага, газрын тос болон уул уурхайн чиглэлийн аж ахуйн нэгж байгууллагаас бусад аж ахуйн нэгжүүдийн хувьд ажилтан төлдөг НДШ-ийн 50%-ийг он дуустал сар бүр төрөөс буцаан олгох зарчмын шийдлийг Засгийн газар гаргаж байна. Энэ бол хүнд үеийг давахад инфляцтай уялдуулсан арга хэмжээ юм.

НДШ-ийн асуудал хүнд байдалд орчихсон байгаа учир багц асуудлыг Засгийн газраас УИХ-тай ярьж, хувийн тэтгэврийн сан, хуримтлалын нэгдсэн сан зэрэг  олон асуудал дээр Нийгмийн даатгалын санг бодитоор мөнгөжүүлэхтэй холбоотойгоор авч үзэх шаардлага үүсэж байна. Дунд хугацаанд реформ хийх энэхүү асуудлыг УИХ-тай хамтарч яаралтай шийдэх нь зүйтэй" гэв.

Иргэн өөрийн төлдөг 9.5 хувийн шимтгэлийн 50%-ийг он дуустал буцаан авна. Хувиараа НДШ төлөгч нарт мөн адил

Хөдөлмөр, Нийгмийн Хамгааллын сайд А.Ариунзаяа "Нийгмийн Даатгалын Шимтгэлийн/НДШ/ 50 хувийн буцаан олголт газрын тос болон уул уурхайн салбарт ажилладаг иргэдэд хамаарахгүй. Эдгээрээс бусад салбарын ажилтнуудад хамаарна. Өөрөөр хэлбэл иргэн өөрийн төлдөг 9.5 хувийн шимтгэлийн 50%-ийг он дуустал буцаан авна. Хувиараа НДШ төлөгч нарт мөн адил буцаан олголт өгнө. Энэ нь түр зуурын арга хэмжээ. Харин Эрүүл Мэндийн Даатгалын шимтгэлд өөрчлөлт ороогүй" хэмээн тайлбарлалаа.

Хүснэгт. Даатгуулагчийн орлогоос төлөх шимтгэлийн хувь хэмжээний задаргаа /Нийгмийн Даатгалын тухай хуульд зааснаар/

УИХ-аар хэлэлцэн баталбал тавдугаар сараас мөрдөгдөж эхэлнэ 

Шимтгэлийг хэзээнээс буцаан олголтыг хэзээ өгөх тухай тодруулахад Сангийн сайд Б.Жавхлан "Ирэх долоо хоногт Засгийн газар тогтоолын төслөө УИХ-д өргөн барина. УИХ-аар хэлэлцэн баталбал тавдугаар сараас мөрдөгдөж эхлэх болов уу" гэлээ.

ВИДЕО: