"Хатуу хөл хорио тогтоохгүй. Гуравдугаар сарын 15-наас улбар шар түвшин рүү 14 хоног шилжинэ"

Гэрэл зургийг MPA.mn

УОК өнөөдөр хуралдсан тухай мэдээлсэн. Коронавирусийн халдварын нөхцөл байдалтай холбогдуулан гаргасан шийдвэрээ танилцуулж байна.

ШУУД ҮЗЭХ: /2021.03.13/

Шадар сайд С.Амарсайхан “Бид цаг үеийн нөхцөл байдлаас шалтгаалан мэнргэжлийн байгууллагын үнэлгээг үндэслэн бэлэн байдлын зэрэглэлүүд рүү шилжих тухай бид өмнө нь мэдээлж байсан.

Энэ хүрээнд шар буюу хоёдугаар түвшингээс улбар шар буюу гуравдугаар түвшин рүү шилжиж байна" гэв.

Өөрөөр хэлбэл Улаанбаатар хотод халдварын тархалт нэмэгдэж буйтай холбогдуулан хатуу хөл хорио тогтоохгүйгээр гамшгийн үеийн дөрвөн түвшний хоёрдугаар буюу ШАР түвшний дэглэмд буйг гуравдугаар түвшний УЛБАР ШАР түвшин рүү шилжүүлж, ахиуллаа.

Мэдээллийн дараа тэрбээр сэтгүүлчдийн асуултад хариуллаа.

-Улбар шар түвшинд шилжсэнтэй холбоотойгоор ямар, ямар байгууллагын үйл ажиллагааг хязгаарлаж байна вэ?

-Улбар шар түвшинд 14 хоногийн хугацаанд шилжиж ажиллана. Энэ хугацаанд бид халдвар хамгааллын дэглэмээ сайн сахиж эрсдэлээ бууруулж чадвал буцаад шар түвшин рүүгээ буюу хэвийн түвшинд шилжинэ. Тиймээс энэ хугацаанд бүх иргэд хичээх шаардлагатай.

Дийлэнх иргэд халдвар хамгааллын дэглэмээ мөрдөхгүй байна. Бид ийм задгай байсаар байвал цаашид бүр хатуу хөл хорио буюу улаан түвшин рүү шилжих нөхцөл үүсэхийг үгүйсгэхгүй. Энэ бол биднээс шууд хамааралтай асуудал.

-Вакцинжуулалтын ажил улбар шар түвшинд эрчимтэй үргэлжилж чадах уу?

-Вакцинжуулалтын ажил хэвийн үргэлжилж байна. Цаашид эрчимтэй явагдаж тавдугаар сарын 1-н гэхэд Улаанбаатар хотын нийт насанд иргэдээ  бүрэн вакцинжуулж дуусна. Энэ хугацаанд орон нутгийн эрсдэлтэй бүсэд ажиллаж буй ажилтан, албан хаагчдаа вакцинд хамруулна.