Ерөнхий сайд Нетаньяху коронавирусийн эсрэг вакцин хийлгэсэн анхны Израйль хүн боллоо

Хүн амынхаа вакцинд итгэх итгэлийг нэмэгдүүлэхийн тулд Израйлийн ерөнхий сайд Бенжамин Нетаньяху өчигдөр телевизийн камерны өмнө коронавирусийн эсрэг вакцин хийлгэжээ.

Уг арга хэмжээ Бямба гарагт Тел Авивын ойролцоох Шеба Эрүүл Мэндийн Төвд болж, ерөнхий сайд тус улсын анхны вакцины тунг өөртөө хийлгэсэн байна.

Израйль улс нь АНУ-ын Pfizer, Германы BioNTech компаниудын хамтран бүтээсэн коронавирусийн эсрэг вакцины эхний ээлж болох 300,000 тунг хүлээж аваад байгаа юм.

Энэ оныг дуусахаас өмнө 3.8 сая тунг нэмж авахаар төлөвлөжээ.

“Хэрвээ бүгдээрээ нэг зорилготой байж, бүгдээрээ вакцинжуулалтад хамрагдвал бид цар тахлаас салсан дэлхийн анхны улс болж чадна. Үүний төлөө хамтдаа хичээцгээе” гэж Нетаньяху тариулсныхаа дараа хэлсэн байна.

Израйлийн олон нийтийн дунд вакцинд итгэх итгэл сул байгаа нь сүүлийн үеийн судалгаанаас харагдсан юм. Тухайлбал Ynet News сайтаас явуулсан санал асуулгаар тус улсын иргэдийн 25 орчим хувь вакцинжуулалтад шууд хамрагдахад бэлэн байгаагаа илэрхийлсэн бол 64 орчим хувь нь яаралгүйгээр алсдаа хамрагдах бодолтой байгаагаа мэдэгдсэн байна.

Эх сурвалж: NBC