"Хорио цээрийн хугацаа сунгагдвал 12 дугаар ангийн сурагчдыг тусгайлан хичээллүүлэхээр судалж байна"

2019-2020 оны хичээлийн жилд ерөнхий боловсролын 620 сургууль үйл ажиллагаа явуулж байна. Үүний 590 нь төгсөх 12 дугаар ангитай.

Нийт 21,798 бүлэг байгаагаас 1,146 нь 12 дугаар анги юм. Элсэлтийн ерөнхий шалгалтын товлосон хугацаанд өөрчлөлт оруулахгүй тул хорио цээрийн хугацаа сунгагдах тохиолдолд ямар зохион байгуулалт хийхээр төлөвлөж буй талаар БСШУСЯ-ны Ерөнхий боловсролын бодлогын газрын дарга Т.Ням-Очир ийнхүү мэдээлэв.

Тэрбээр "Хорио цээрийн хугацааг дөрөвдүгээр сарын 30-наас хойш сунгавал 12 дугаар ангийн сурагчдыг тусгайлан хичээллүүлэх ямар боломж нөхцөл байгааг судалж байна.

Цаашид хичээл сургалтын үйл ажиллагааг тусгай горимд шилжүүлбэл нэг сургуульд 100-аас дээш тооны сурагч хичээллэхгүй, анги дүүргэлт 15-аас хэтрэхгүй гэх мэтчилэнгээр тооцоолж байгаа. Мөн нэг багшийн хичээлийн давтамж ямар байх, суудлууд хэр хэмжээний зайтай байхыг мэргэжлийн байгууллагаас өгч буй зөвлөгөөнд үндэслэн боловсруулж байна" гэлээ.

Арванхоёрдугаар ангидаа 100-аас дээш сурагчтай 66 сургууль улсын хэмжээнд байгаа аж.

Түүнчлэн Т.Ням-Очир "Элсэлтийн ерөнхий шалгалт нь 12 жилийн хугацаанд юу судалж, мэдсэнийг шалгадаг тул теле хичээлээр тухайн сурагч 12 дугаар ангийн хичээлээсээ гадна өмнөх ангийн агуулгуудаа сэргээн, санах боломжийг олгож байгаа" хэмээн онцоллоо.

Нийт ерөнхий боловсролын сургуулийн

• 53 хувь нь нийслэл болон аймгийн төв дээр
• 42 хувь нь сумын төв дээр
• таван хувь нь баг дээр үйл ажиллагаа явуулж байгаа юм.

Тиймээс сумын төв, баг дээрх интернэтэд холбогдох дэд бүтцийг тооцоолон тараах материалыг тусгайлан бэлджээ.

Үүнд 12 дугаар ангийн сурагчдад зориулсан бүх теле хичээл, ЭЕШ-д зориулсан теле хичээл, жишиг даалгавар, зөвлөгөө мэдээллийг багтаасан CD, гарын авлагыг хүүхэд бүрийн тоогоор хэвлэж, бэлэн болгосон байна.