“Шударга ёс” бүлэг тарснаар Засаг задрах уу

УИХ-ын чуулганы өчигдөр оройн буюу тавдугаар сарын 5-ны хуралдааны эхэнд УИХ-ын дарга З.Энхболд “Шударга ёс” эвслийн бүлгийн үйл ажиллагаа дуусгавар болсныг мэдэгдэв. 

Парламент дахь бүлэг найм хүртэл гишүүнтэй байх ёстой. Гэтэл Д.Тэрбишдагва, Ч.Улаан нар МАХН-МҮАН-ын “Шударга ёс” эвслийн бүлэг, МАХН-аасаа гарч МАН-д элссэн. Тиймээс “Шударга ёс” эвслийг бүлгийн гишүүдийн тоо наймд хүрэхгүй болсон тул ийнхүү цаашид үйл ажиллагаа явуулах боломжгүй болж байгаа юм. 

Харин “Шударга ёс” эвслийн бүлэг тарснаар Засгийн газар цаашид тогтвортой үйл ажиллагаа явуулж чадах уу гэдэг асуулт гарч ирээд буй. Тэгвэл аль нэг бүлэг тарснаар Засгийн газрын тогтвортой үйл ажиллагаанд нөлөөлөх боломжгүй аж. 

Энэ талаар Монгол Улсын сайд, Засгийн газрын Хэрэг эрхлэх газрын дарга С.Баярцогт дараах тайлбарыг өглөө.

 

Тэрбээр “Энэ бол хоёр өөр асуудал. Засгийн газрыг бүрдүүлэх асуудал бол УИХ-ын сонгуульд оролцсон субъектүүдийн хооронд яригддаг. Ардчилсан нам, “Шударга ёс” эвсэл, Иргэний Зориг Ногоон намын хооронд байгуулсан гэрээнүүд хүчин төгөлдөр байгаа. Сонгуульд оролцсон субъектүүдийн хувьд  Ардчилсан нам, “Шударга ёс” эвсэл, Иргэний Зориг Ногоон намд өөрчлөлт ороогүй учраас Засгийн газрын үйл ажиллагаа, чадамжийн хувьд ямар ч асуудал гарахгүй. Сонгуульд оролцсон субъектээрээ асуудал тайлбарлагдах учраас Засгийн газар эрх зүйн чадамжтай.

Эвслийн бүлэггүй болж байгаа ч “Шударга ёс” эвслийн үйл ажиллагаа үргэлжилж байгаа учраас Засгийн газрын чадамжид ямар нэгэн байдлаар нөлөөлөхгүй.

Засгийн газрын үйл ажиллагаанд оролцох, УИХ-ын бүлэгтэй байх нь хоёр өөр асуудал. Тиймээс Засгийн газар үйл ажиллагаагаа хэвийн үргэлжлүүлэх эрх зүйн чадамжтай.” гэлээ.

Үндсэн хуулийн 43 дугаар зүйлд  Засгийн газрын огцруулах үндэслэлүүдийг тодорхой заасан байдаг. Үүнд:

1. Засгийн газар бүрэн эрхээ хэрэгжүүлэх боломжгүй гэж үзвэл хугацаа дуусахаас өмнө огцрох тухайгаа Ерөнхий сайд Улсын Их Хуралд өргөн мэдүүлж болно.
2. Ерөнхий сайд, эсхүл Засгийн газрын гишүүдийн тэн хагас нь нэгэн зэрэг огцорвол Засгийн газар бүрэлдэхүүнээрээ огцорно.
3. Улсын Их Хурал Засгийн газрыг огцруулах тухай өөрөө санаачилсан болон Ерөнхийлөгчийн санал, Ерөнхий сайдын мэдэгдлийг хүлээн авснаас хойш арван тав хоногийн дотор Засгийн газрыг огцруулах эсэхийг хэлэлцэн шийдвэрлэнэ.
4. Улсын Их Хурлын гишүүдийн дөрөвний нэгээс доошгүй нь Засгийн газрыг огцруулах тухай саналыг албан ёсоор тавибал Улсын Их Хурал хэлэлцэн шийдвэрлэнэ гэсэн байдаг. 

Тиймээс бүлэг тарснаар эсвэл МАХН гурван сайдаа татсанаар Засгийн газрын тогтвортой үйл ажиллагаанд нөлөөлөх хуулийн заалт байхгүй ажээ.

Гэрэл зургийг mpa.mn