Хакерууд Оросын статистикийн байгууллагын системд нэвтэрч, Украины дайны хохирлын хэмжээг ил болгожээ
Оросын төрийн статистикийн агентлаг болох Росстатаас алдагдсан мэдээлэлд дурдсанаар Украины дайнд 450,000 гаруй Оросын иргэн амиа алджээ. Ингэснээр тус дайн нь 2022 оноос хойш Орос улсад хүмүүсийн амиа алдах шалтгаануудын дотроос дөрөвдүгээрт бичигдэх хэмжээний ноцтой үзүүлэлт болж байна.
Оросын эрх баригчид 2022 оны есдүгээр сараас хойш байлдааны талбар дахь хохирлынхоо талаар албан ёсоор мэдээлэл өгөхөө зогсоосон бөгөөд хараат бус эх сурвалжуудын гаргасан тооцооллыг "найдваргүй" хэмээн үгүйсгэсээр ирсэн юм. Росстатаас алдагдсан мэдээллээс харвал Украины дайн нь Дэлхийн Хоёрдугаар дайнаас хойш Орос улсын оролцсон хамгийн их хүний амь нас хохирсон мөргөлдөөн болж байна. Энэ нь Зөвлөлт-Афганистаны есөн жилийн дайны үеэр амиа алдсан зөвлөлтийн 13,000 цэргийн тооноос хол давсан үзүүлэлт юм.
Аравдугаар сарын 29-нөөс арваннэгдүгээр сарын 1-ний хооронд "Беларусийн кибер партизанууд" (Belarus Cyber Partisans) болон "Silent Crow" хэмээх хакерын бүлгүүд Росстатын цахим хуудсанд халдаж, тус байгууллагын нүүр хуудсан дээр мэдэгдэл байршуулсан байна. Орос улсад "хэт даврагч байгууллага" хэмээн хориглосон эдгээр бүлгүүд Оросын эдийн засаг, хүн ам зүй, түүнчлэн дайны улмаас амссан хохирлын талаарх мэдээллийг хулгайлжээ.
Германы Олон улс, Аюулгүй байдлын Хүрээлэнгийн Орос, Евразийн асуудал хариуцсан хэлтсийн дарга Янис Клуге ярихдаа "Энэ бол Оросын хохирлын талаарх хамгийн ноцтой мэдээлэл алдагдсан тохиолдол юм. Одоогийн дайн түүхэндээ байгаагүй хамгийн их хүний амь нас авч одсон мөргөлдөөн болсон гэдэг нь баттай баримт болж байна" хэмээн мэдэгджээ.
"Silent Crow” бүлгийн гаргасан энэхүү тоонд зөвхөн цэргийн албан хаагчид төдийгүй агаарын цохилтын улмаас амиа алдсан энгийн иргэд, мөн 2024 онд Украины зэвсэгт хүчин Оросын Курск муж руу нэвтрэх үеэр амь үрэгдсэн хүмүүс ч багтсан байна. Гэвч энэ тоо баримтад сураггүй алга болсон цэргүүд болон Оросын зэвсэгт хүчинд элссэн гэж үздэг 27,000 гаруй гадаадын иргэдийн тоо ороогүй тул нийт хохирлын хэмжээ үүнээс ч их байх магадлалтай юм.
Уг тоо өмнө нь гарч байсан таамаглалуудтай таарч байна.
Тухайлбал Их Британийн батлан хамгаалах яам есдүгээр сарын эхээр Оросын талд тулалдаж байгаад хагас сая гаруй хүн амиа алдсан бөгөөд шархадсан хүмүүсийг оруулбал нийт хохирогчдын тоо 1.5 саяд хүрч болзошгүйг мэдээлж байв.
Украины нутагт довтолж эхэлснээс хойш Орос улс эзэлсэн газар нутгийнхаа нэг километр тутамд 6.2 цэргээ алдсан байна. Фронтын шугам дээр Оросын ахиц дэвшил зогсонги байдалд орсон хэдий ч бүртгэгдсэн амиа алдагсдын тоо нэмэгдсээр байгаа тул энэ үзүүлэлт улам муудаж байгаа юм.
Хакерууд Росстатаас олж авсан мэдээллээрээ “rosstat-leaks.com” сайт үүсгэж, тоо баримтуудыг дэлгэрэнгүй харуулжээ.
Эх сурвалж: The Moscow Times
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
