Хоёр удаагийн үхлийн тариаг тэсэж гарсан Криста Пайкийн биеийн байдал хүнд байгааг өмгөөлөгч нь мэдээллээ

Гэрэл зургийг Reuters агентлагийн онцгой зөвшөөрөлтэйгөөр ашиглав

АНУ-ын Теннесси мужийн цаазын ялтай хоригдол Криста Пайк үхлийн тун бүхий тариаг хоёр удаа хийлгэсэн ч амьд үлдэж, биеийн байдал нь хүнд байгааг түүний өмгөөлөгч Пүрэв гарагт мэдээлжээ.

Энэ явдлын улмаас тус мужийн захирагч энэ онд гүйцэтгэгдэх байсан бүх цаазаар авах ажиллагааг зогсоох шийдвэр гаргасан байна.

Пайкийн өмгөөлөгч Рэнди Спайви "Одоогоор түүний биеийн байдлын цаашдын төлөв болон эрүүл мэндийн талаар тодорхой мэдээлэл алга байна. Гэхдээ тэр одоо амьд байгааг бид мэдэж байна" гэж сэтгүүлчдэд мэдээлжээ.

Өмгөөлөгчид одоо түүний ялыг хөнгөрүүлэхийг хүсэж байгаа юм байна. Өдгөө 50 настай Пайк нь 1996 онд Коллин Слеммерийн амийг хөнөөсөн хэргээр цаазаар авах ял сонссон юм.

Өмгөөлөгчдийн мэдээлснээр Лхагва гарагт түүнд пентобарбитал бодисын үхлийн тунг хоёр удаа тарьсан боловч тэрээр амьд үлджээ. Үүний дараа түүнийг түргэн тусламжийн автомашинаар эмнэлэгт хүргэсэн байна.

Пайк 18 настай байхдаа атаархлын улмаас тухайн үеийн найз залуу Тадарил Шиппийн хамт 19 настай Слеммерийн биед халдаж, тамлан зовоож, амийг нь хөнөөж байжээ.

 

Гэрэл зургийг Reuters агентлагийн онцгой зөвшөөрөлтэйгөөр ашиглав

Лхагва гарагт хэрэгжүүлэхээр төлөвлөсөн цаазаар авах ажиллагаа нь сүүлийн мөч хүртлээ хуулийн маргаан дагуулсан үйл явдал болсон юм. Эцэст нь АНУ-ын дээд шүүх үхлийн тун бүхий тариа хийхийг зөвшөөрсөн шийдвэр гаргасан билээ.

Цаазаар авах ажиллагааг дэмжиж, үйл явцыг нүдээр үзэхээр Теннесси мужид очсон Слеммерийн ээж Мэй Мартинез бүтэлгүйтсэн оролдлогын дараа NBC News сувагт өгсөн ярилцлагадаа үүнийг "эмх замбараагүй, болхи үйл явдал" байсан гэж тодорхойлжээ.

Пүрэв гарагийн үдээс хойш Пайкийн өмгөөлөгчид цаазаар авах оролдлогын үеэр болсон явдлын талаар дэлгэрэнгүй мэдээлэл өгч, нууцлагдмал байдалд өрнөсөн аймшигтай үйл явдлыг дүрслэн ярьсан байна.

Спайви "Өнгөрсөн шөнө цаазаар авах ажиллагааны баг судсаар тариа хийх шугам тавихад бүтэн цаг зарцуулсан. Би зөвхөн түүний зүүн гарт дор хаяж долоон удаа зүү хатгасныг тоолсон бөгөөд нэг зүүг амжилтгүй оролдлогын дараа сугалж авахад муруйсан байдалтай харагдсан” гэж хэлжээ.

Хоёр дахь удаагаа үхлийн тун тарьсны дараа хэдэн минутын турш "хатагтай Пайк амьсгалсаар байгаа нь тодорхой" байсан ч ажиглагчдыг хаалттай хөшигний цаана, харанхуй өрөөнд байлгасан гэж тэр ярьсан байна.

Дараа нь Спайви мужийн захирагч Кристагийн ялыг одоо хөнгөрүүлэх ёстой гэж үзэж байгаагаа илэрхийлсэн юм. Захирагч өмнө нь энэ хүсэлтийг хүлээж аваагүй.

Пайкийн өөр нэг өмгөөлөгч Стивен Феррелл хуулийн бусад боломжит арга замуудыг мөн судалж байгаагаа мэдэгджээ.

"Бид энэ асуудлыг сайтар бодож үзэхийг хүсэж байгаа бөгөөд Кристагийн биеийн байдал сайжирч, өөрийн хүсэл сонирхлоо илэрхийлэх боломжтой болно гэдэгт найдаж байна" гэж тэр хэлсэн юм.

Теннесси мужийн захирагч Билл Ли өчигдөр хараат бус шалгалт оруулах тушаал гаргасан бөгөөд Пайкийг цаазлах ажиллагаа амжилтгүй болсон явдлыг "нарийвчлан шалгана", үүнд "хугацаа шаардагдана" гэж мэдэгджээ.

“Тодорхойгүй олон асуулт гарч ирж байна. Манай мужийн иргэд эдгээрийн хариултыг авах эрхтэй бөгөөд энэхүү шалгалтын зорилго ч үүнд оршино” гэж тэр хэлсэн байна.

Түүний цаазлах ажиллагааг бүхэлд нь түр зогсоох тушаалын үр дүнд хүн амины хэрэгтэй Гэри Саттоныг арванхоёрдугаар сарын 3-ны өдөр цаазлах төлөвлөгөө хойшилж байна.

Пайкийн цаазлах ажиллагааг хариуцаж гүйцэтгэсэн Теннесси мужийн засан хүмүүжүүлэх газар ялыг гүйцэтгэхдээ дагаж баримталсан дүрмээ зөвтгөсөн мэдэгдэл гаргажээ.

"Прокурорын Ерөнхий Газраас баталсан, хууль ёсны дагуу тогтоогдсон цаазлах ажиллагааны журмын алхам бүрийг бид мөрдөж ажилласан" гэж уг мэдэгдэлд өгүүлсэн байна.

"Журамд заасан үхэлд хүргэх тарилгын бодис нь тогтмол үр дүнтэй байсаар ирсэн бөгөөд уг журамд энэ орой хийгдсэн үйлдлээс өөр нэмэлт ажиллагаа явуулахыг зөвшөөрдөггүй” гэж цааш нь тайлбарлажээ.

Пайкийн өмгөөлөгчдийн шүүхэд гаргасан баримт бичигт дурдсанаар эхний оролдлого амжилтгүй болсны дараа мужийн журмын дагуу пентобарбитал бодисын хоёр дахин өндөр тунг нэмж хийсэн боловч тэрбээр амьд үлдсэн байна.

"Энэхүү цаазлах ажиллагаа нь хатагтай Пайкт шаардлагагүй зовлон шаналал учруулж, харгис, хэрцгий шийтгэлээс ангид байдлаар цаазлуулах эрхийг нь зөрчиж байна" гэж түүний өмгөөлөгчид мэдэгдэв.

Теннесси мужийн Прокурорын Ерөнхий Газар шалгалт оруулах мужийн захирагчийн шийдвэрийг дэмжиж буйгаа илэрхийлээд "Юу болсныг бид мэдэх шаардлагатай" гэж мэдэгджээ.

Энэ нь Теннесси мужийн албаныхан хоригдлыг цаазлах гэж оролдоод бүтэлгүйтсэн хоёр дахь тохиолдол болж байна.

Тавдугаар сард Тони Каррутерсыг цаазлах ажиллагааг ажилтнууд нь үхлийн тун бүхий тариа хийх судлыг олж чадаагүйн улмаас цуцлагдаж байв. Үүний улмаас Каррутерсын цаазаар авах ажиллагааны товыг нэг жилээр хойшлуулсан байдаг.

Криста Пайк нь Теннеси мужийн сүүлийн 200 гаруй жилийн түүхэнд цаазлуулсан анхны эмэгтэй хоригдол болох байв. Тус муж хамгийн сүүлд 1820 онд эмэгтэй ялтныг цаазалж байжээ.

Эх сурвалж: BBC