"Моносын уулзвараас Эмээлт хүртэлх авто зам дагуу гэрэлтүүлэг угсрах ажлын явц 40 орчим хувьд хүрчээ
Нийслэлийн Сонгинохайрхан дүүргийн 34 дүгээр хорооны нутаг дэвсгэр, Моносын уулзвараас Эмээлт хүртэлх авто замын гэрэлтүүлгийн ажлыг өнгөрсөн сард эхлүүлжээ.
Өнөөдрийн байдлаар гэрэлтүүлгийн ажлын гүйцэтгэл 40 хувьд хүрсэн бөгөөд авто замын дагуух гэрэлтүүлгийн шугам сүлжээ, тулгуур болон бусад шаардлагатай байгууламжийн угсралт, суурилуулалтын ажлыг гүйцэтгэж буйг "Нийслэлийн баруун бүсийн зам засвар, арчлалтын газар" ОНӨААТҮГ-аас мэдээллээ.
Тухайн чиглэлийн авто замын дагуух гэрэлтүүлгийн хүртээмжийг нэмэгдүүлснээр оройн болон шөнийн цагаар зорчиж буй иргэд, жолооч нарын аюулгүй байдлыг хангах, зам тээврийн осол, эрсдэлийг бууруулах, замын орчныг илүү аюулгүй болгоход ач холбогдолтой байна.
Нийслэлийн Замын сангийн хөрөнгө нь авто тээврийн хэрэгслийн татвар, зам ашигласны төлбөр зэргээс бүрддэг билээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
