Умард Солонгосын цэргүүд Оросын талд тулалдсаныг Москва, Пёняны эрх баригчид анх удаа хүлээн зөвшөөрлөө

Өнөөдөр өглөө Умард Солонгосын эрх баригчид Оросын нутаг дэвсгэрийг Украины зэвсэгт хүчний хяналтаас чөлөөлөх байлдааны ажиллагаанд өөрийн цэргийн хүчийг оролцуулснаа анх удаа хүлээн зөвшөөрсөн утгатай мэдэгдэл гаргажээ.

Оросын Курск мужийг чөлөөлөх тулаанд ялалт байгуулсан нь хоёр улсын “зэвсэгт хүчний найрамдал нөхөрлөл стратегийн хамгийн дээд түвшиндээ хүрснийг харууллаа” гэж Солонгосын Мэдээний Төв Агентлаг магтан мэдээлсэн байна.

Өнгөрсөн Бямба гарагт Оросын эрх баригчид бас Курск мужийн нутаг дэвсгэрийг Украины цэргээс бүрэн чөлөөлснийг зарлахдаа Умард Солонгосын цэргүүдэд талархал илэрхийлсэн юм.

Энэ нь Умард Солонгосын цэргүүд Оросын талд байлдсаныг Москва албан ёсоор анх удаа хүлээн зөвшөөрсөн хэрэг байлаа.

Гэхдээ Украины тал цэргүүд нь Курскээс бүрэн гарсныг үгүйсгэсээр байгаа.

Удирдагч Ким Жон Ун өнгөрсөн онд ОХУ-ын ерөнхийлөгч Путинтэй байгуулсан иж бүрэн стратеги түншлэлийн гэрээний хүрээнд цэргийн хүчээ илгээх шийдвэр гаргасныг эрх баригч Хөдөлмөрчдийн Намын цэргийн зөвлөл мэдээлсэн тухай өнөөдрийн мэдээнд дурджээ.

“Төрийн тэргүүний өгсөн тушаалын дагуу манай улсын зэвсэгт хүчний салбар ангиуд ОХУ-ын нутаг дэвсгэрийг өөрийн улсын нутаг мэт үзэж, хоёр орон бат бэх холбоотнууд болохыг батлан харууллаа” гэж уг мэдэгдэлд өгүүлсэн байна.

Ким Жон Ун гадаадад үүрэг гүйцэтгэсэн цэргийн алба хаагчдаа “Шударга үнэний төлөө эх орныхоо нэр хүндийг өндөрт өргөсөн баатрууд” гэж магтсаныг өнөөдрийн мэдээнд эш татжээ.

Мөн Умард Солонгос нь “ОХУ шиг хүчирхэг улстай эвсэх нь нэр төрийн хэрэг” болохыг мэдээнд онцолсон байна.

Умард Солонгосын нийт 14,000 орчим цэрэг Оросын армийн бүрэлдэхүүнд тулалдсаны 3,000 орчим нь хохирлоо нөхөх зорилгоор нэмж илгээсэн цэргүүд байсан гэж Украины тал тооцоолдог.

Тэд эхэн үедээ дрон, хуягт машин зэрэг орчин үеийн зэвсэг техниктэй тулалдах туршлагагүйгээс нэлээд хохирол амссан ч сүүлд хурдтай дасан зохицсон гэлцэж байна.

Үүнээс өмнө Москва, Пёняны аль аль нь Умард Солонгосын цэргүүд ОХУ-д очсоныг албан ёсоор хүлээн зөвшөөрч байгаагүй юм.

Эх сурвалж: Reuters