Трампын тогтоосон ТикТокийн хоригийг хойшлуулах хугацаа энэ долоо хоногт дуусна

Хятадын ТикТок сошиал платформын эзэмшлийг Америкийн компанид шилжүүлээгүй тохиолдолд АНУ-ын зах зээлд үйл ажиллагааг нь хориглох хуулийг Конгресс өнгөрсөн онд баталж байв.

Ерөнхийлөгч Дональд Трамп тангараг өргөсөн эхний өдрөө энэ хоригийг 75 хоног хойшлуулах шийдвэр гаргасан юм.

Тэгвэл энэ хугацаа дөрөвдүгээр сарын 5-ны өдөр буюу Бямба гарагт дуусах гэж байна.

Хэрвээ энэ долоо хоногт ТикТокийн эзэмшлийн хувийг Хятадын ByteDance компаниас худалдаж авах этгээд гарч ирэхгүй бол 170 сая орчим америк хүн дуртай үйлчилгээнээсээ салах юм.

Тэгвэл Дональд Трамп өчигдөр орой АНУ-ын ерөнхийлөгчийн нисэх онгоцонд сэтгүүлчидтэй уулзахдаа ТикТокийн худалдан авагч удахгүй тодорч магадгүй талаар цухуйлгасан байна.

“Бидэнд маш олон боломжит худалдан авагч байгаа. ТикТокийг сонирхох сонирхол асар өндөр байна. Би ТикТокийг хаагдалгүй үлдээсэй гэж хүсэж байна” гэж Трамп хэлжээ.

Хувийн хөрөнгө оруулалтын Blackstone компани ТикТокийн АНУ дахь үйл ажиллагааны багахан хувийг эзэмших боломжийг судалж байгаа тухай Ройтерс агентлаг Баасан гарагт мэдээлсэн юм.

ТикТокийг Хятадын компани эзэмших нь Америкчуудын хувийн мэдээллийг Бээжингийн эрх баригчдад алдах эрсдэлтэй гэж Вашингтон болгоомжилж байгаа.

Трамп өмнө нь хэлэхдээ хэрвээ ТикТокийн хоригийг хойшлуулсан хугацаанд худалдан авагч гарч ирэхгүй бол дахин сунгах тухай ярьж байсан юм.

АНУ-ын Конгрессын өнгөрсөн онд баталсан хуулиар бол ТикТокийн эзэмшил Хятадын компаниас салаагүй тохиолдолд энэ оны нэгдүгээр сарын 19-нөөс эхлэн хаагдах ёстой байлаа.

Эх сурвалж: Reuters