АНУ-ын дэд ерөнхийлөгчийн гэргий Гринланд аралд зочлохоор болсныг Цагаан ордон зарлав

АНУ-ын дэд ерөнхийлөгч Жэй Ди Вэнсийн гэргий Уша Вэнс энэ долоо хоногт Дани улсын захиргаанд оршдог Гринланд аралд зочлохоор болсныг Цагаан ордон өчигдөр зарлажээ.

Хатагтай Вэнсийн тэргүүлсэн төлөөлөгчид Пүрэв гарагаас эхлэн тус арлын түүхэн газруудаар тойрон аялж, ард иргэдийнх нь соёл уламжлалтай танилцах гэнэ.

Тэд гуравдугаар сарын 29-нд буцахаар төлөвлөжээ.

Уша Вэнсээс гадна Цагаан ордны үндэсний аюулгүй байдлын зөвлөх Майк Уолц, эрчим хүчний сайд Крис Райт нар мөн Гринланд дахь АНУ-ын цэргийн баазад ойрын өдрүүдэд зочлохоор болсон байна.

Ерөнхийлөгч Дональд Трамп дэлхийн хамгийн том арал Гринландыг ямар нэг аргаар АНУ-ын бүрэлдэхүүнд нэгтгэх санаагаа байнга илэрхийлдэг.

Гэхдээ Гринланд арлын оршин суугчдын дийлэнх хэсэг АНУ-ын бүрэлдэхүүнд орохыг эсэргүүцэж байгааг сүүлийн үеийн судалгаа харуулж байгаа.

Арлын улс төрийн намууд ч бас энэ асуудал дээр санал нэг байгаа бөгөөд одоо өөртөө засах эрхтэй харьяалагдаж буй Дани улсаас аажмаар тусгаар тогтнож, бие даан хөгжихийг илүүд үзэж байна.

Ням гарагт Гринландын ерөнхий сайд Муте Эдэгэ дотоодын хэвлэлд ярихдаа Уолцын айлчлалыг “өдөөн хатгалга” гэж үзэж байгаагаа илэрхийлжээ.

“Түүний айлчлалын цорын ганц зорилго нь бидэнд хүч чадлаа харуулах юм. Тэр бол Трампын хамгийн ойрын зөвлөх бөгөөд айлчлалаараа Трампын зорилгод америкчуудыг итгүүлэх гэж байгаа нь тодорхой. Энэ айлчлалын дараа бидэнд ирэх дарамт шахалт улам нэмэгдэнэ” гэж тэр ярьсан байна.

Гринланд арал нь байгалийн асар их баялагтайгаас гадна газар зүйн байрлалын хувьд стратегийн чухал ач холбогдолтой нутаг юм.

АНУ-д нэгтгэх санааг Гринланд арлынхнаас гадна Дани улсын эрх баригчид эрс няцааж байгаа.

Гуравдугаар сарын 11-нд болсон орон нутгийн сонгуулиар Дани улсаас салж, тусгаар тогтнох үйл явцыг урт хугацаанд хэрэгжүүлэх зорилготой нам ялалт байгуулсан юм.

Дани улсын ерөнхий сайд Метте Фредериксен айлчлалын тухай мэдээний талаар хариулахдаа “энэ бол бидний хувьд нухацтай хандах ёстой асуудал” гэж мэдэгджээ.

Тэрбээр Дани улс АНУ-тай хамтын ажиллагаагаа хөгжүүлэх хүсэлтэй ч энэ нь “тусгаар тогтнолыг хүндэтгэх үндсэн зарчим” дээр суурилах ёстойг хэлсэн байна.

Эх сурвалж: Reuters