"Улаанбаатар хотод 804,656 тээврийн хэрэгсэл үзлэг, оношилгоонд хамрагдсанаас 80% нь 10-аас дээш жилийн насжилттай"

Гэрэл зургийг MPA агентлагийн онцгой зөвшөөрөлтэйгөөр ашиглав

Автомашинаас үүдэлтэй агаарын бохирдлыг бууруулах арга хэмжээний талаар Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч А.Амартүвшин өнөөдөр танилцуулав.

Тэрбээр "2024 онд Улаанбаатар хотод 804,656 тээврийн хэрэгсэл техникийн үзлэг, оношилгоонд хамрагджээ. Эдгээр тээврийн хэрэгслийн 72.8% нь суудлын автомашин бол ачааны автомашин 11.6%, автобус 1.6%, тусгай зориулалтын автомашин 1%, бусад тээврийн хэрэгсэл 13%-ийг эзэлж байна.

Ашиглалтын хугацаагаар ангилбал 0-3 жил 6%, 4-9 жил 14%, 10-аас дээш жилийн насжилттай тээврийн хэрэгсэл 80%-ийг эзэлжээ.

804,656 тээврийн хэрэгслээс бензин хөдөлгүүрт 33%, дизель 21.6%, хайбрид 44%, газ 1.2%, цахилгаан хөдөлгүүрт машин 0.2% байна. 

Автомашинаас үүдэлтэй агаарын бохирдлыг бууруулахын тулд олон төрөлт нийтийн тээврийг хөгжүүлэх замаар мега төслүүдийг хэрэгжүүлнэ. Туул хурдны зам, Шинэ тойрог зам, метро, дүүжин тээвэр, BRT төслийг хэрэгжүүлж, 2040 онд автомашинаас үүдэлтэй агаарын бохирдол 8.6% болтол бууруулахаар төлөвлөсөн" болохыг танилцуулав.

2024 онд авто тээврээс үүдэлтэй агаарын бохирдол 28.9% байжээ.