АНУ-ын нийслэлд болсон онгоцны ослоор уран гулгалтын хоёр багш, 11 тамирчин амиа алджээ

АНУ-ын нийслэл Вашингтон хотын нисэх буудалд иргэний агаарын тээврийн нисэх онгоц, цэргийн нисдэг тэрэгтэй мөргөлдсөн харамсалтай осол гарсан юм.

Ослын улмаас онгоцонд зорчиж явсан 64 хүн, нисдэг тэргэнд гурван хүн бүгд амиа алдсан гэж албаныхан мэдээлсэн.

Тухайн үед American Airlines компанийн охин компани PSA Airlines компанийн Bombardier CRJ700 загварын 5342 аяллын дугаартай нисэх онгоц Канзас мужийн Вичита хотоос Вашингтонд буух гэж байв.

Тэгвэл энэ онгоцонд уран гулгалтын хос төрөлд дэлхийгээс гурван медаль хүртсэн нэг гэр бүлийн Евгения Шишкова, Вадим Наумов байсныг онцолсон.

Хос хоёр ОХУ-ын нэр дээр 1994 онд Японы Чиба хотод болсон уран гулгалтын Дэлхийн Аварга Шалгаруулах Тэмцээн (ДАШТ)-ээс алтан медаль хүртсэн бол 1995 онд мөнгө, 1993 онд хүрэл медаль авчээ.

Мөн Европын Аварга Шалгаруулах Тэмцээн (ЕАШТ)-ээс нэг мөнгө, дөрвөн хүрэл авч байв.

Хэдийгээр тив, дэлхийгээс олон медаль авсан ч олимпод одгүй тамирчид. 1992-1994 оны өвлийн олимпод шагналт IV болон V байр эзэлсэн бол 1998 оны олимпын багт орж чадаагүй юм. Ингээд тэр жилээ зодог тайлж, дасгалжуулагчийн албанд шилжсэн.

Хосууд 1998 оноос АНУ-д амьдрах болж, 2001 оны наймдугаар сард хүү Максим Наумовыгоо төрүүлсэн юм. 

Максим Наумов АНУ-ын улсын аваргаас гурван медаль хүртсэн. 2020 оны залуучуудын ДАШТ-д шагналт байранд шалгарсан тамирчин.

Хүү нь эцэг, эхийнхээ хамт улсын аварга шалгаруулах тэмцээнд оролцсон ч осолдсон онгоцонд байгаагүйг Бостон хотын клубээс гаргасан гашуудалд мэдэгджээ.

 

АНУ-ын уран гулгалтын аварга шалгаруулах тэмцээн энэ сарын 20-ноос 26-ныг дуустал Канзас мужийн Вичита хотод болсон. Улмаар өсвөрийн тамирчид нь 28-ныг дуустал сургалтын хөтөлбөрт хамрагдаад буцаж явсан байна. Талийгаачид АНУ-ын Бостон хотын уран гулгалтын клубт дасгалжуулагчаар ажиллаж байсан юм.

Уран гулгалтын хоёр дасгалжуулагчаас гадна 11 тамирчин ослын улмаас амиа алдсан. Үүнээс зургаа нь Бостон хотын өсвөрийн клубийн тамирчид байв.

Эх сурвалж: Inide The Games