Б.Одбаяр: Энхтайвны гүүрнээс Тэмээтэй хөшөө хүртэлх замд долгион үүссэн хэсгийг “Трүйроад” компани өөрсдийн хөрөнгөөр дахин засварлана
Энхтайвны гүүрнээс Тэмээтэй хөшөөний уулзвар хүртэлх авто замыг өнгөрсөн Баасан гарагийн 23:00 цагаас хааж авто замын засвар шинэчлэлийн ажлыг гүйцэтгэж буй. Энэ явцад авто замын тэгш байдал алдагдаж долгион үүссэн асуудлыг иргэд олон нийтийн сүлжээнд шүүмжилсэн. Энэ талаар холбогдох албаныхан тайлбар өгөв.
Нийслэлийн Замын Хөгжлийн Газрын/НЗХГ/ дарга Б.Одбаяр: Хугацаа ёсоор дээрх авто замыг 21-ний өдрийн өглөө 06:00 цагт нээх ёстой. Шөнийн цагаар авто зам засварын ажлыг гүйцэтгэж байх хугацаанд цас орсон. Үүний улмаас авто замын тэгш байдал алдагдаж, хэсэг газар долгион үүссэн байдалтай байна. Тиймээс гүйцэтгэгч байгууллага буюу “Трүйроад” компани өөрсдийн хөрөнгөөр дахин засварын ажлыг үргэлжлүүлнэ.
“Трүйроад” компанийн ерөнхий инженер Ж.Мөнхсүх: Бид Бямба гарагт хучилтын ажлаа эхлүүлсэн. Ингэх явцад авто замын тэгш байдал алдагдаж хэсэг долгион үүссэн. Энэ аравдугаар сард цаг агаар дулаан байвал авто замыг засварлах бүрэн боломжтой. Хэрэв цаг агаар хасах градуст орвол технологи алдагдах учраас хучилт хийхгүй.
Нийслэлийн Засаг даргын нэгдүгээр орлогч Т.Даваадалай "Хасах градуст авто замыг хучих боломжгүй тул авто замын төслүүдийг түр зогсооё. Технологийн горим алдагдана. Тиймээс дулааны улиралд буюу хавар авто замын ажлыг үргэлжлүүлье" гэв. Ингэснээр нийслэлийн хэмжээнд авто замын засвар шинэчлэлийн ажлыг зогсоохоор болжээ.
Өнөөдрийн байдлаар дараах гурван байршлын замыг шинэчилж хөдөлгөөнийг нээжээ
- "Номин моторс" төвөөс "Титан" центр хүртэлх
- "Тэс петролиум" ШТС-аас 10-р хорооллын уулзвар хүртэлх
- Кино үйлдвэрийн баруун талаас Доржийн гудамж хүртэлх авто зам.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
32 СЭТГЭГДЭЛТЭЙ
|
