П.Дэлгэрнаран: МАН 35%, АН 30.1%, ХҮН нам 10.4%, Үндэсний Эвсэл 5.2%, ИЗНН 5%-ийн санал авсан байна

Гэрэл зургийг MPA агентлагийн онцгой зөвшөөрөлтэйгөөр ашиглав

Сонгуулийн Ерөнхий Хорооноос хэвлэлийн хурал зохион байгуулж, санал хураалтын дүнг танилцуулж байна.

СЕХ-ны дарга П.Дэлгэрнаран "УИХ-ын ээлжит сонгуулийн санал хураалт амжилттай явагдлаа. Сонгуулийн автоматжуулсан системээр дүнг дамжуулж, өнгөрсөн шөнө 04:20 цагт эцэслэгдлээ. 2,198 хэсгийн хороонд бүгд дүнгээ дамжуулж дууслаа.

Системээр дамжуулсан нийт сонгогчдын ирц 69.4%-тай дууслаа. Гадаадад байгаа иргэдийн саналын уг системд нэгтгэгдсэн. Гадаадад байгаа 9,768 хүний саналыг тоолсон.

Энэ удаагийн сонгуульд 1.4 сая сонгогч саналаа өгсөн, ирц сайн байлаа. 2020 онтой харьцуулахад саналаа өгсөн сонгогчдын тоо буураагүй, өссөн. Залуучууд сонгуульдаа идэвхтэй оролцлоо.

Санал хураалт Улаанбаатарт 70%, орон нутагт 60%-аас дээш ирцтэй дууслаа. Сонгуулийн автоматжуулсан системийн дүн эцсийн дүн болно. 

Хуулиар дангаараа сонгуульд оролцож буй нам нийт сонгогчийн 4%, хоёр намын эвсэл 5%, гурав болон түүнээс дээш намын эвсэл 7%-ийн босго давбал УИХ-ын суудал хуваарилалтад оролцоно.

Сонгуульд оролцсон 19 нам, хоёр эвслийн хоёр эвсэл нь хоёр намынх учир 5%-ийн босготой.

Намуудын авсан саналын хувь:

1. МАН 35%
2. АН 30.1%
3. ХҮН нам 10.4%
4. Үндэсний Эвсэл 5.2%
5. Иргэний Зориг Ногоон Нам 5%-ийн дэмжлэг авсан байна. 

Улс төрийн намын хуулиар нийт сонгогчийн нэгээс дээш хувийн дэмжлэг авсан бол улс төрийн намын санхүүжилтийг авах эрхтэй болсон. Нийт сонгогчийн нэгээс дээш хувийн санал авсан 9 нам байна. Үүнд дээрх таван намаас гадна:

1. Шинэ Нэгдсэн Эвсэл 4.8%
2. Үнэн ба Зөв Нам 2.8%
3. Иргэний Хөдөлгөөний Нам 1.4%
4. Бүгд Найрамдах Нам 1.3%-ийн дэмжлэг авчээ.

Гар тооллогыг өчигдөр 23:00 цагийн үед хийж эхэлсэн, дуусаагүй 6-7 газар үлдээд байна, удахгүй дуусна. Гар тооллого дууссан хэсгийн дүн системээр дамжуулсан дүнгээс зөрөөгүй.

Саналын хуудсыг гараар тоолохдоо камерын хяналт дор нэг бүрчлэн тоолж байгаа учир цаг орж байна. Гар тооллого нь анхаарал шаардсан ажил учир 30 гаруй цаг ажиллаж байна" гэж ярилаа.

Энэ удаагийн сонгуулийг зохион байгуулахад цагдаа, онцгой, тагнуул, хил хамгаалах байгууллага, УБЕГ, СЕХ-ны мэдээлэл технологийн баг гээд 40,000 орчим алба хаагч ажиллажээ.

ШУУД ҮЗЭХ: