Ж.Сүхбаатар: Сайд болоод ногоон автобусны асуудалд холбогдоно гэж яаж бодох билээ дээ

Гэрэл зургийг MPA агентлагийн онцгой зөвшөөрөлтэйгөөр ашиглав

Ногоон автобустай холбоотой хэргийг шүүхэд шилжүүлсэн талаар өнгөрсөн сард мэдээлсэн билээ. 

Тус хэрэгт яллагдагчаар татагдсан УИХ-ын гишүүн Ж.Сүхбаатар өнөөдөр Төрийн ордонд өөрийн байр сууриа илэрхийлэв. 

Тэрбээр "Ногоон автобус хаана байгааг би яаж хэлэх билээ. Эхний 20 автобусыг албан ёсоор хүлээж авсан. Хотын дарга бид хоёр 80 автобусыг олон нийтэд танилцуулсан учраас хэл ам үүссэн. 

Тэр 80 автобусыг албан ёсоор хүлээж аваагүй байхад нь олон нийтэд танилцуулсан тул нийгмийн анхааралд орж яригдсан. Би автобус хүлээж авдаг, буцаадаг, сонгон шалгаруулдаг хүн биш. Би ямар ч автобусны үйлдвэртэй танилцаагүй.

Би элдэв хууль бус зүйл хийгээгүй. 20 автобус хүлээж авах үед нь хууль бусаар үүрэг даалгавар өгч нөлөөлсөн хэмээн намайг буруутгасан. Энэ асуудалд тодорхой нотлох баримт байхгүй. 

Заавал нэг хэрэгтэн, том албан тушаалтан байх ёстой, тэр нь би. Гэм буруугүй гэдгээ нотолно. 20 автобусыг хүлээж авахдаа хууль бусаар нөлөөлж, дутуу байсныг мэдсэн бол юу гэж 80 автобусыг олон нийтэд танилцуулаад явж байх билээ. Дутуу байгааг мэдвэл дараа дараагийн арга хэмжээг эрүүл ухаанаар бодно доо. 

Капитал засвартай автобус орж ирсэн гэж тогтоогдсон зүйл байхгүй. Шинжээчийн дүгнэлт дээр 2023 онд үйлдвэрлэгдсэн, зарим зүйлд дүгнэлт өгөх бололцоо алга. Зарим зүйл нь техникийн үзүүлэлтийн түвшинд хүрээгүй байна гэж гарсан. 

Капитал засвар хийсэн байна гэдэг яриа хэвлэл мэдээлэл, олон нийтийн хүрээнд яригдсан асуудал. Яг бодитойгоор капитал завсар хийчихсэн гэх баримт хаана байна вэ. 

Шинэ автобус байсан эсэхийг шүүх дээр шийднэ. Энэ асуудал гараагүй бол УИХ-д нэр дэвших байсан. Би ёс зүйн асуудлуудыг ярьж байсан. Сайд болоод ногоон автобусны асуудалд холбогдоно гэж яаж бодох билээ дээ" хэмээн ярилаа.