Зургаадугаар ангийн 21 сурагч 17:00 цагийн үед бөөлжиж, дотор эвгүйрхсэн байдалтай эмнэлэгт хүргэгджээ
Монгол бизнес дээд сургуулийн байранд хичээллэж буй ХУД-ийн 18 дугаар сургуулийн зургаадугаар ангийн 21 сурагч өнөөдөр 16:00 - 17:00 цагийн үед бөөлжиж суулгасан байдалтай эмнэлэгт хүргэгдсэн гэх мэдээлэл НЗДТГ-т иржээ.
Энэ талаар 18 дугаар сургуулийн захирал мэдээлэл өглөө.
Тэрбээр "Технологийн хичээл дуусах үед ангийн хойно сууж байсан хүүхдүүдийн дотор муухайрсан байна. Энэ үед багш нь хүүхдүүдийг ангиас гаргасан. Үүнээс хойш хүүхдүүдийн бие нь эвгүйрхэж эхлэхэд эцэг эх нь цагдаад мэдэгдсэн.
Шинж тэмдэг илэрч буй бүх хүүхдийг эмнэлгийн байгууллагад хүргэсэн. Хүүхдийн дотор эвгүйрхэж, охид нь бөөлжсөн байдалтай байсан. Хүүхдүүдийн өгч буй мэдээллээр ангийн хойноос гэнэт муухайн үнэр үнэртэж эхэлсэн. Энэ үед нэг хүүхэд нь үнэртэй ус цацсан гэсэн. Монгол бизнес дээд сургуулийн байранд 18 дугаар сургуулийн 6-8 дугаар ангийн 720 хүүхэд хичээллэж байгаа.
Одоогоор зургаан хүүхэд эмнэлэгт ажиглалтын байдалтай байна. Гэртээ харьсан хүүхдүүдийн биеийн байдал хэвийн байгаа гэсэн мэдээллийг эцэг эхчүүд ирүүлсэн. Тухайн ангийн 54 хүүхдээс 53 нь өнөөдрийн хичээлдээ ирсэн" хэмээн ярив.
Харин Нийслэлийн эрүүл мэндийн төвөөс хүүхдүүдийн биеийн байдлын талаар "18 хүүхдийг эх нялхаст хүргэсэн. Одоогоор хүүхдүүдээс шинжилгээ авч байна. Хүүхдүүдийн биеийн байдлыг харахад хордлого талын шинж тэмдэг давамгай ажиглагдсан.
Эхний хийжилтийн үзүүлэлтээр хүнд хүүхдүүдэд тав, харьцангуй гайгүй хүүхдүүдэд хэвийн зааж байсан. Тав гэдэг нь хүнд хэлбэр биш. Мансуурсан хүүхдүүдэд иймэрхүү шинж тэмдэг илрэхгүй" хэмээн ярив.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
14 СЭТГЭГДЭЛТЭЙ
|
