МАШ ИХ БАЯРЛАЛАА

Түүний нэрийг Жэймс Фиппс гэдэг байв. Хүүг 8 настай байхад нь буюу 1796 онд Эдвард Женнер хэмээх эрхэм балчир жаалд анхны орчин үеийн вакцин хийжээ.

Уг вакцин Жэймс хүүг цагаан цэцэг өвчнөөс хамгаалсан байдаг. Энэ вакцин нь хойч үе, үр хүүхдээ үхэл хагацал, өвчин зовлонгоос хамгаалахын тулд Хойд Африкийн эмч эрдэмтэд, Константинополийн хөгшид, Дундад улсын Мин гүрний оточ нарын хэдэн зуун жилийн турш хийсэн судалгаа, шинэ бүтээл, инновацуудад суурилсан, тэдгээрээс санаа авсан нээлт байв.

Вакцин буй болох хүртлээ хүн төрөлхтөн ямар урт зам туулсныг, шинэ вакцин гартал ямар их судалгаа туршилт хийснийг би сайн мэднэ. Учир нь би НҮБ-ын Хүүхдийн Санд ажилладаг. Сүүлийн 75 жилийн турш НҮБ-ын Хүүхдийн Сан нь вакцины дэлхийн хамгийн том худалдан авагч байж, дэлхий дээрх хүүхдүүдийн 45 хувийг дархлаажуулсан юм.

Би өөрөө ч хүүхэд байхдаа вакцин хийлгэсэн. Хэрэв вакцин хийлгээгүй бол  өнөөдөр амьд байхгүй ч байсан байж мэднэ. Вакцин хийлгэсэн учраас өнөөдөр амьд сэрүүн, эрүүл саруул өсөн бойжиж байгаа хүүхэд болгоны өмнөөс миний, мөн надтай ижил НҮБ-ын Хүүхдийн Санд ажилладаг бүх хүний өмнөөс бид энэ хайрын захидлыг бичин та бүхэндээ баярлалаа гэж хэлж байгаа юм.

Халдварт саагийн эсрэг вакцин гаргасан вирус судлаач Жонас Сок Танд баярлалаа. Ковид-19-ийг ялан дийлэхэд томоохон хувь нэмэр оруулсан mRNA-ийн судалгаанд амьдралаа зориулсан Кэйти Карико Танд баярлалаа. Шар чичрэг өвчний эсрэг вакцин гаргахын  тулд эрдэмтэд нь өөрийн цусаа шумуулд соруулж байсан судлаачдын багийн ахлагч, Нобелийн шагналтан Макс Тэйлэр Танд баярлалаа.

 

 

Үйлдвэрүүдэд вакцин савладаг ажилтнуудад баярлалаа. Нарны илчээр ажилладаг хөргөгч бүтээсэн зохион бүтээгчдэд баярлалаа. Дөнгөж төрсөн нярайд вакцины эхний амин тунг хүргэж өгөхөөр үерлэсэн гол мөрнийг туулж, цас мөсийг гаталж, уул хад, тал цөлийг даван явдаг нисэгчид, машин тэрэг, усан онгоцны жолооч нартаа баярлалаа.

Улаан бурхан, улаанууд өвчнөөс 90 сая хүүхэд хамгаалах түүхэн их гараанд цаг нартай өрсөн явж хүүхдийн амь аврах вакцин тээвэрлэсэн Пакистаны тэмээ, тэмээн жинчдэд баярлалаа. Вакцин тарих тоолондоо бяцхан найз нартаа өвдөлтийг мэдрүүлэхгүйн тулд инээдтэй нарийхан хоолойгоор хүүхэд зугаацуулан аргадах эмч, сувилагч нартаа баярлалаа. Бас 1956 онд тайзан дээр гарахдаа халдварт саагийн эсрэг вакцины тухай мэдлэгийг дэлхийн хүмүүст хүргэхийн тулд өөрөө вакцин хийлгэсэн Элвис Преслид баярлалаа. Учир нь яг л Элвис шиг хаан гэгддэг хүмүүс бусдын төлөө гэсэн хаан сэтгэлтэй байдаг.

Өнөөдөр бид та бүгдэд илгээж буй энэ захиа бол хайрын захидал юм. Учир нь вакциныг нээхэд,  бүтээхэд, үйлдвэрлэхэд, хүүхдэд амжиж хүргэхэд хайр л хэрэгтэй байдаг. Хайр байгаа учраас зөрчил мөргөлдөөнтэй бүсэд НҮБ-ын Хүүхдийн Сангийн ах, эгч нар хэлэлцээр хийж дайтахыг түр зогсоож хүүхдүүдэд вакциныг нь хүргэдэг. Хайр байсан учраас Хүүхдийн Сангийн Гүйцэтгэх Захирал Жим Грант 1980-д онд дэлхийн хүүхдийн 20-хон хувьтай байсан дархлаажуулалтыг 80 хувьд хүргэж чадсан байдаг. Хайр байсан  учраас  Дэлхийн Эрүүл Мэндийн Байгууллага 1966 онд Дархлаажуулалтын Үндсэн Хөтөлбөрийг нэвтрүүлэн 11-хэн жилийн дараа цагаан цэцэг өвчнийг дэлхийгээс арчиж хаясан байдаг.

 

Вакцинууд жилдээ 3 сая хүүхдийн амийг авардаг. Гэхдээ вакцинаа хийлгэж чаддаггүй хүүхдүүд байсаар л байгаа. Цар тахлаас сэргээн босгох үйл ажиллагаанд хөрөнгө оруулалт хийж буй энэ үед хүүхэд болгонд эрүүл мэндийн тусламж үйлчилгээг хүргэж чадахуйц эрүүл мэндийн тогтолцоог цогцлуулан босгох ховорхон боломж гарч байна.

Иймээс энэ нь засгийн газруудад ч хандсан хайрын захиа юм. Засгийн газрууд дахь эрүүл мэндийн тогтолцооны чухгийг ойлгодог манлайлагчдад хандсан захиа юм. Учир нь бидний өнөөгийн амжилтын суурь, мөн цаашдын амжилтын нөхцөл бол бүх нийтийг хамруулсан эрүүл мэндийн тогтолцоонд хөрөнгө оруулалт хийж, дэмжин хөгжүүлэх явдал юм.

 

Эцэст нь баярлалаа гэж хэлэх нэг л хүн үлдлээ. Энэ нь та өөрөө. Энэ бол Танд ч илгээж буй хайрын захиа юм шүү. Учир нь та хэзээ нэгэн цагт вакцин хийлгэж байсан бол, өөрийнхөө хүүхдүүдийг вакцинд хамруулж байсан бол та гар гараасаа барилцан үр хүүхэд, хүн төрөлхтний эрүүл мэндийн манаанд зогсож буй олон зуун сая хамгаалагчдын нэг юм. Хүн төрөлхтөн хайраар, чин сэтгэлээр, итгэл үнэмшлээр мөн хамтран ажилласнаар юунд хүрч болдог вэ гэдгийн нотолгоо бол Та өөрөө. Иймээс өөрийнхөө, мөн НҮБ-ын Хүүхдийн Сангийн ажилтан болгоны, мөн вакцинаа хийлгэсэн учир өнөөдөр амьд сэрүүн, эрүүл энх өсөн бойжиж байгаа хүүхэд болгоны өмнөөс та бүхэндээ баярлалаа.

Баярлалаа. Баярлалаа. Баярлалаа.

Хүн болгонд урт насалж, удаан жаргахыг ерөөе.