Монголын Засгийн газар, Оюутолгой компанийн төлөөллүүд өнөөдөр уулзана
“Рио Тинто” группээс Монгол Улсын Засгийн газарт дөрвөн заалт бүхий албан захидал ирүүлсэн талаар мэдээлсэн. Уг саналын талаарх урьдчилсан уулзалт өнөөдөр 14:00 цагаас Хууль зүй, дотоод хэргийн яаманд болох гэж байна.
Уулзалтад манай талаас Оюутолгой ордын ашиглалтад Монгол Улсын эрх ашгийг хангуулах тухай УИХ-ын тогтоолын дагуу Засгийн газраас байгуулагдсан Ажлын хэсгийн гишүүд, нөгөө талаас "Рио Тинто" компанийн Зэсийн группийн захирал Б.Болд тэргүүтэй төлөөлөл оролцох ажээ.
Уулзалтаар албан захидалд дурдагдсан:
- “Рио Тинто”-гийн зүгээс 2.3 тэрбум ам.долларын өрийн 70 хувь буюу 1.6 тэрбум ам.долларыг тэглэх,
- Хөрөнгө оруулагч талаас нэг их наяд төгрөг буюу 350 сая орчим ам.долларын төлбөр төлөх,
- 5.4 тэрбум ам.доллароос дээш зардлын хэтрэлтэд менежментийн төлбөр авахаа болих зэрэг асуудлыг хэлэлцэх юм байна.
Мөн ирэх сарын 7-8‑ны үед Оюутолгой компанитай Монгол Улсын Засгийн газар эрчим хүч тогтвортой нийлүүлэх гэрээнд гарын үсэг зурахад бэлэн болсон гэдэг мэдээллийг Оюутолгой ордын ашиглалтад Монгол Улсын эрх ашгийг хангуулах тухай УИХ-ын тогтоолын дагуу Засгийн газраас байгуулагдсан Ажлын хэсгийн дарга Х.Нямбаатар өглөө.
