Эх сурвалж: Батлан хамгаалах яам

Зэвсэгт хүчний 326 дугаар ангийн хугацаат цэргийн алба хаагч бусдад зодуулж, гэмтсэн хэрэг гарсан талаар Зэвсэгт хүчний Хуурай замын цэргийн штабын дарга, бригадын генерал Л.Онцгойбаяр тайлбар мэдээлэл өглөө.

"Тус ангийн удирдлага, шат дараалсан албан тушаалтнуудад хатуу хариуцлага тооцохоор шийдвэрлэв"

Тэрбээр “Зэвсэгт хүчний Хуурай замын цэргийн командлалын харьяа Зэвсэгт хүчний 326 дугаар ангийн салааны захирагч, дэслэгч Г нь гуравдугаар сарын 28-ны өдөр харуулын даргын үүрэг гүйцэтгэж байх үедээ дүрмийн бус харилцааны зөрчил гаргаж, харуулд гарч байсан байлдагч Б-ын биед халдан хүнд гэмтэл учруулжээ.

Гэмтэл авсан хугацаат цэргийн алба хаагчийг Төрийн тусгай албан хаагчдын нэгдсэн эмнэлэгт цаг алдалгүй хүргэж, эмнэлгийн яаралтай тусламж үзүүлж буй.

Одоогоор тухайн алба хаагчид гурав хоногийн тогтворжуулах эмчилгээ хийж байна.

Харин салааны захирагч, дэслэгч Г нь Хан-Уул дүүргийн Цагдаагийн хоёрдугаар хэлтэст шалгагдаж байгаа бөгөөд хэрэг зөрчлийн шалтгааныг тогтоох ажиллагаа явагдаж байна. Мөн ЗХЖШ-ын Цэргийн албаны шалгалт давхар хийгдэж байгаа.

Дээрх хэрэгтэй холбоотойгоор Батлан хамгаалахын дэд сайдын ахалдаг Дэг журам, сахилгын хариуцлагын салбар зөвлөл шуурхай хуралдаж, тухайн анги байгууллагын удирдлага, шат дараалсан албан тушаалтнуудад хатуу хариуцлага тооцохоор шийдвэрлэлээ.

"Бид шат шатандаа хатуу хариуцлага хүлээнэ"

Түүнчлэн Хуурай замын цэргийн командлалын удирдлага, ЗХЖШ-аас ч хариуцлага хүлээхэд бэлэн байна. Учир нь дэслэгч Г-ийн цэрэгт алба хаах тушаал нь гараад хууль хяналтын байгууллагад шилжсэн.

Ийм хариуцлагагүй үйлдэл гарсан нь бидний буруу. Тиймээс байлдагч Б-ын ар гэрээс уучлал хүсэж байна. Байлдагч Б нь 2020 хоёрдугаар ээлжийн цэрэг татлагаар Улаанбаатар хотын Чингэлтэй дүүргээс Зэвсэгт хүчний 326 дугаар ангид ирсэн.

Монгол Улсын иргэн үүргээ биелүүлж, эх орондоо тангараг өргөж цэргийн алба хааж байх үед нь зодож, гэмтээсэн асуудал бол гутамшиг.

Тиймээс бид шат шатандаа хатуу хариуцлага хүлээхэд бэлэн байна" гэсэн юм.