"Одоогийн хууль зүйн орчинд төр иргэдээс хандив авах зохицуулалт байхгүй"

Гэрэл зургийг mpa.mn

Засгийн газар арванхоёрдугаар сарын 30-н буюу өчигдрийн хуралдаанаараа хүүхдийн төлөө фонд байгуулж, 10 тэрбум төгрөгийн эх үүсвэрийг шийдвэрлэсэн. Цаашид нэмэгдэх тус сангийн хөрөнгийг хүүхдийн номын сан, хүүхдийн театр, хүүхэд, залуучуудын соёл спортын цогцолборууд зэрэг хүүхэд залуучуудын хөгжлийг дэмжих байгууллагуудыг шинээр барихад зарцуулах талаар өчигдөр мэдээлсэн. 

Тэгвэл Монгол Улсын Ерөнхийлөгчийн санаачилгаар “Хүүхдийн төлөө фонд”-ын үйл ажиллагааг сэргээж буйтай холбогдуулан анхны хуримтлал үүсгэх зорилгоор зохион байгуулсан “Монгол соёл-Монгол хүүхэд” цахим тоглолтыг МҮОНТ-ээр орой нь шууд дамжуулж, иргэд, ААН, байгууллагуудаас нийт 2.2 тэрбум төгрөгийн хандив цуглуулав. 

Тэгвэл энэ үйл ажиллагааг хууль бус гэсэн байр суурийг цөөнгүй хууль, мэргэжлийн хүмүүс илэрхийлсээр байна. 

Тэдний нэг болох УИХ-ын гишүүн Б.Энхбаяр өөрийн цахим хуудастаа одоогийн хууль зүйн орчинд төр иргэдээс хандив авах зохицуулалт байхгүй гэдгийг тодотгосон байна.

Тэрбээр "Засгийн газар бол “тусгай сан” байгуулах буюу Тусгай сангийн хуульд өөрчлөлт оруулж(УИХ-аар заавал батлагдана) байж хуулийнх нь хүрээнд асуудлыг шийдэх агуулга ярьсан байна даа. Одоогийн хууль зүйн орчин төр иргэдээс хандив авах зохицуулалт байхгүй тул хуульчлагдаж байж л шийднэ. 

Засгийн газар энэхүү хуулиар байгуулагдах сандаа 10 тэрбумын эх үүсвэр шийдэж буйг Ерөнхий сайд тодотгож. Харин чоно борооноор гэгчээр Засгийн газрын хажуугаар Төрийн бус байгууллага байгуулж, иргэдээс хандив авсан нөхдийн асуудал хуулийн өмнө очих биз. Энэ мөнгө угаах шинжтэй гэмт үйлдэлд оролцсон Соёлын сайд, дэд сайддаа улс төрийн хариуцлага тооцох нь зүй ёс. Энэ Төрийн бус байгууллагад өгсөн хандивыг Засгийн газрын тусгай санд дайчлан авбал зохино" гэжээ.

Түүнээс гадна УИХ-аас гадуур, улсын төсөвт оруулж батлуулахгүйгээр хяналтгүйгээр төрийн өмчит компаниуд ямар их мөнгө “эргэлдүүлж” буйгаа өөрсдөө элдэв “буянт үйл” хийж барьж өгч байгаад баяртай байгаагаа дурдсан байна. Жилийн өмнө Засгийн газраас УИХ-д өргөн барьсан Төрийн бус байгууллагын хуулийг хэлэлцэж, батлах шаардлагатай УИХ-ын гишүүн Б.Энхбаяр онцолсон байна. Тэрбээр төрийн өмчит компанийн тухай хуультай болгох санаачилгыг эхлүүлсэн хүний нэг. 

Түүнээс гадна Хууль зүйн сайд асан Х.Тэмүүжин Хүүхдийн фондод төрийн албан хаагчдын цалинг хандивласныг мөн шүүмжилж, байр сууриа илэрхийлсэн. Тэрбээр "Төрийн албан хаагчдын цалинг хэн нэг дарга нь алба хаагчдаас өөрсдөөс нь асуулгүйгээр кампаничилж хандивладгийг тухайн эрх мэдэлтэн албан тушаалаа хэтрүүлсэн үйлдэл гэж үзэж болно" гэв. Тиймээс хуулиар хязгаарлахгүй бол төр хөдөлмөрийн мөлжлөг явуулж байгаа мэт харагдаж байгааг сануулжээ.

Ийнхүү цар тахлын хүнд нөхцөл байдал, 15 чиглэлээс бусад байгууллагын үйл ажиллагаа зогсож, эдийн засаг хямралд орсон энэ нөхцөлд "Хүүхдийн төлөө фонд" байгуулах нэрээр иргэдээсээ хандиваар мөнгө босгож байгааг эсэргүүцсэн иргэд олон нийтийн сүлжээнд байр сууриа илэрхийлсээр байна.