Хүүхдийн төлөө теле тоглолтын үеэр төв номын сан, хүүхэлдэйн театрын цогцолбор барих газартай болж, ₮2.2 тэрбум гаруй хандив цугларчээ

Эх сурвалж: Соёлын яам

Шинэ оны босгон дээр Соёлын яамныхаа санаачлагыг уухайлан дэмжсэн уран бүтээлчид нүсэр арга хэмжээг сэтгэл нэгдэн зохион байгуулж 30 жилийн турш алдагдсан боломжийг сэргээхээр хүч түрлээ. Хүүхдийн хөгжлийн төлөө нэгдсэн энэ үйл ажиллагааг ард түмэн эрвийх дэрвийхээрээ дэмжиж яг одоогийн байдлаар Хүүхдийн төлөө фондын дансанд 2.227.408.005 төгрөг цуглаад байна. 

Аливаа хандив сэтгэлийн хүчээр босдог учраас тэр дундаа хүүхдийн хөгжлийн төлөөх бүтээн байгуулалтад зарцуулагдах хөрөнгийг хэн хүнгүй дэмжин босгож буй нь энэ. Монгол Улсын Ерөнхий сайд ч гэсэн Хүүхдийн төлөө фонд байгуулахыг дэмжин, хөрөнгийн эх үүсвэр бий болгохоор боллоо. 

26 жилийн дараа байгуулагдсан Соёлын яамтайгаа уран бүтээлчид нэгдэж, урлаг, спорт, соёлын алдартнууд нь хүүхдийн хөгжлийн төлөө уухайлж, тэднийхээ хүсэл тэмүүллийг иргэд ч хандиваараа батлан хөхиүлсэн нь энэ. 
Сэтгэл нэгдвэл бүтээх хүч бий болдгийн жишээг өчигдөр орой бид бэлхнээ харлаа. 

Улаанбаатар хотын захирагч газрын асуудлыг шуурхайлан шийдвэрлэснээр Соёлын яамны бодлого, төлөвлөлтөд тусаад байсан Хүүхэлдэйн театр, Хүүхдийн төв номын сангийн цогцолбор байгуулагдах үүсгэл ийн бий боллоо. 

Соёлын бүтээн байгуулалтад өнөөдрийнх шиг анхаарч, улсын төсөв, гаднын хөрөнгө оруулалт болон олон нийтийн дэмжлэгээр энэ олон бүтээн байгуулалтыг зэрэгцүүлэн хийж байсан цаг хугацаа ойрын үед тохиогоогүйг хэн хүнгүй мэдэж байгаа. 

Байсныгаа хуучруулж, муутгаж, хувьчилж орхисон он жилийн балаг л арилаагүй байна. Хэдий хүртэл алдаагаа ярьж, урьдын харуусалтай зууралдах билээ. Урагшаа харж гэрэлт ирээдүйнхээ төлөө бүтээн бий болгохгүй бол эх орны минь иргэний гуравны нэг нь болсон хүүхдүүд хүссэн цагтаа тухтай суух, олон улсын стандартад нийцсэн номын сангүй, дэлхийтэй мөр зэрэгцэх театргүй байна шүү дээ. 

Ирэх оны эхээр Үндэсний номын сангийн барилга ашиглалтад орж, араас нь Чингис хаан хаад язгууртны музей үүдээ дэлгэж үзэгчдээ угтана. Соёлын өвөө сэргээн засварлаж, түүх дурсгалаа хамгаалдаг Соёлын өвийн үндэсний төв маань хэдийнэ шинэ байртай болчихсон, нүүж орох өдрөө л хүлээж байгаа. Ингээд бодохоор ирээдүй илүү тод гэрэлтэй болж харагдах юм. 

Хүүхдийн хөгжил, тэдний зүтгэл, ертөнцийг танин мэдэх тэмүүлэл, гэгээрэл дээр л ирээдүйн эх орны хөгжил сүндэрлэнэ. Соён гэгээрэл үгүй бол аливааг ухаж ойлгох тэнхэлгүй бусдын үгэнд автамхай сул дорой нэгэн бий болдгийг эртний сэтгэгчид дурдан онцолсон байдаг. Өөрийгөө жолоодох чадвартай, оюун ухаантай ирээдүй хойчийнхоо төлөө өнөөдөр хийж буй хөрөнгө оруулалт, өвчин зовлон, өнөө маргаашийн хоол унднаас чухал гэдгийг ч сэтгэл нийлсэн хүмүүс баталсан буй заа. 

Өөрт заяасан оюун ухаандаа эзэн болох ирээдүйн төлөө “Хүүхдийн төлөө фонд”-ын бүх хөрөнгө оруулалт зарцуулагдаж, олон нийтэд нээлттэй үйл ажиллагаагаа явуулна гэсэн амлалт, Төрийн тэргүүн, Ерөнхий сайдаа нэгтгэн уриалсан Соёлын яамны зүтгэл, талархан дэмжсэн уран бүтээлчид, тавтай болгоосон ард түмэндээ ч гүнээ мэхийн талархъя.

Эх сурвалж: Соёлын яам

Эх сурвалж: Соёлын яам