ХУУЧИРСАН МЭДЭЭ: 2020/07/24-НД НИЙТЛЭГДСЭН
Хөгжлийн банкны захирал асан Н.Мөнхбат нарт холбогдох хэргийг давж заалдах шүүхээс анхан шатны шүүхэд буцаажээ
iKon.MN
Хөгжлийн банкны Гүйцэтгэх захирал Н.Мөнхбат
Нийслэлийн Эрүүгийн хэргийн давж заалдах шатны шүүх 2020 оны 7 дугаар сарын 21-ний өдрийн хуралдаанаараа Хөгжлийн банкны дарга асан Н.Мөнхбат, Б.Шинэбаатар, гишүүн асан Ч.Отгочулуу нарт холбогдох эрүүгийн хэргийг анхны шатны шүүхэд буцаах шийдвэр гаргажээ.
Ингэснээр Сүхбаатар дүүргийн Эрүүгийн хэргийн анхан шатны шүүхийн шүүгчийн захирамжийг хүчингүй болгож, эрүүгийн хэргийг шүүх хуралдаанаар дахин хянан хэлэлцүүлэхээр болж байна.
Сүхбаатар дүүргийн Эрүүгийн хэргийн анхан шатны шүүх уг хэргийг 2020 оны 5 дугаар сарын 1-ний өдөр хэлэлцэж, нэмэлт мөрдөн байцаалтад буцаасан юм.
Нийслэлийн прокурорын газраас Монгол Улсын Хөгжлийн банкны захирлаар ажиллаж байсан Н.Мөнхбат, Төлөөлөн удирдах зөвлөлийн дарга Б.Шинэбаатар нарын эрх мэдэл, албан тушаалын байдлаа урвуулан ашигласан, хууль, дүрэм журам зөрчиж Худалдаа хөгжлийн банкнаас өндөр үнэтэй барилга худалдан авч, давуу байдал олгосон үйлдэлтэй хэрэгт 2020 оны 1 дүгээр сарын 13-ны өдөр яллах дүгнэлт үйлджээ.
Эх сурвалж: Нийслэлийн эрүүгийн хэргийн давж заалдах шатны шүүх
