"Вакцин гарах хүртэл хөл хориогоо үргэлжлүүлэхийг зөвлөж байгаа тул хүүхдүүдийн карантиныг сунгах санал гаргасан"
ЭМЯ-наас сургууль, цэцэрлэгийн карантиныг дахин нэг сараар буюу дөрөвдүгээр сарын 30-н хүртэл сунгах саналтай байгаагаа өчигдөр мэдэгдсэн.
Уг саналын үндэслэлээ ЭМЯ-ны хэлтсийн дарга Д.Нарангэрэл тайлбарлалаа. Тэрбээр "Дэлхий дахиныг хамарсан цар тахлын үед авдаг түгээмэл арга хэмжээ бол хол хорио, хөдөлгөөн хязгаарлах байдаг. Энэ жишгээр сургууль, цэцэрлэгийн үйл ажиллагааг зогсоосон хөл хориог үргэлжлүүлэх саналтай байгаа.
Хэдийгээр өвчний анхны голомт БНХАУ өвчнөө хяналтад авлаа гэж байгаа боловч Европын олон оронд маш өндөр дэгдэлттэй байна. Маш олон эрдэмтэн судлаачдын судалгааны материалтай танилцаж байхад хөл хориог аажмаар цуцлахгүй олон эрсдэл дагуулахыг онцолсон байна. Тухайлбал, хөл хориог нэг өдрөөр алдаж тогтооход өвчний тархалт 40 хувиар нэмэгдэнэ гэдэг тооцоолол байдаг. Эрдэмтэн, судлаачдын зүгээс COVID-19 халдварын эсрэг вакцин, эмчилгээнд яв цав тохирсон эм гарах хүртэл хөл хориогоо үргэлжлүүлэх нь зүйтэй гэсэн зөвлөмжүүдийг өгч байгаа. Тийм учраас хүүхдүүдээ, иргэдээ хамгаалахын тулд хөл хориог сунгах саналтай байгаа.
АНУ-д вакцин гаргаж аваад, хүн дээр турших үйл явц эхэлсэн байна. Энэ үйл явц үргэлжлээд 5-6 сарын дараа вакцинтай болох магадлалтай. Мөн зарим эрдэмтэн, судлаач ес, аравдугаар сард дахин дэгдэлт гарна гэх таамаг дэвшүүлсэн. Дахин дэгдэлт гарахаас өмнө вакцинтай болчих байх гэсэн найдлага байна" хэмээв.
Түүнчлэн Д.Нарангэрэл дарга "Хэн ч энэ өвчний халдварыг авч болох эрсдэлтэй үед бид байна. Гэтэл халдвар зөөвөрлөгдөн орж ирсэн тохиолдлуудад халдвар авсан иргэд тэдний гэр бүлд сэтгэл зүйн дарамт их учирч байгаа. Иргэдийг дайрч доромжлох тохиолдлууд гарч байна.
Төр засаг ямар ч үед иргэнээ хаях ёсгүй. Европын ихэнх орнуудад гаднын иргэд хоол ундгүй, эмнэлгийн тусламж авч чадахгүй нөхцөлд байна. Ийм иргэдээ бид авахаас өөр аргагүй" гэдгийг нэмж хэллээ.
