Алтантуяаг нас барсны дараа манай гэр бүл сүйрсэн хэмээн түүний аав хэлжээ

---

Алтантуяа нас барсны дараа гэрийнх нь санхүүгийн бүх ачаа мөрөн дээр нь бууж, хүнд хэцүүг даван туулж байгаа тухай түүний аав Сэдэвийн Шаарийбуу ярив.

Монголын модель байсан охин нь 2006 онд таалал төгссөнөөс түүний гэр бүхэлдээ сүйрсэн тухай Шах Аламд болсон Шүүх хурал дээр Шаарийбуу ярихад сэтгэл нь нэлээд тавгүйтсэн шинжтэй байв.

 

“Бид бүгд түүнтэй хамт үхсэн” гэж хэлээд, мэдүүлгээ үргэлжлүүлэхээсээ өмнө нулимсаа арчсан юм. Түүнийг нас барснаас нэг жилийн дараа гэр бүлийнхэн нь 100 сая ринггитийн (24.3 сая ам.доллар орчим) нэхэмжлэл гаргасан билээ.

 

Алтантуяаг нас барахад түүний хоёр хүү нь найм, гурван настай байсан бөгөөд өвөө, эмээтэйгээ хамт амьдарч эхэлсэн байна. Бага охин болох Алтантуяа нь боловсролтой, бие даасан, мөн гэр бүлийнхээ санхүүг авч явдаг нэгэн байсан бөгөөд ялангуяа хөгжлийн бэрхшээлтэй бага хүүгийнхээ эмчилгээний зардлыг хариуцдаг байсныг нь Шаарийбуу гуай онцолжээ. “Эхнэр бид хоёрын нас сүүдэр болон орлогын чадамж ямар билээ. Бид яаж ч бодсон охин шигээ мөнгө олж чадахгүй шүү дээ” хэмээн тэтгэвэрт гарсан их сургуулийн профессор тэрбээр шүүхэд хандаж хэлэв.

 

Талийгаач Алтантуяагийн бага хүү Мөнхтулгын Алтаншагай нь тархи, нуруу нугасны саажилттай төрсөн бөгөөд бага наснаасаа хөгжлийн бэрхшээлтэй байсан аж. Харамсалтай нь, тэрбээр 2017 онд 15 настайдаа бурхан болжээ.

 

Тэдний амьдардаг хотод Алтантуяагийн үхлийн талаарх мэдээ хэвлэлээр гарсны дараа том хүү нь бусдад доромжлуулж, сэтгэл санааны дарамтад ордог байсан хэмээн Шаарийбуу өгүүлэв. Саяхан Алтантуяагийн том хүү сүй тавих гэж байж. Гэвч “Бид бэр гуйсан боловч татгалзсан хариу авсан” гэж Шаарийбуу ярив. Тэрбээр иргэний нэхэмжлэл үүсгэж байгаагаа Алтантуяагийн аллагатай холбоотой шүүх хурал болж байгаа ч энэ нь шударга ёсыг амьдралд авчирлаа гэсэн үг биш болохыг онцолсон юм.  “Тиймээс л би энэхүү хүндэт шүүхээс хариулт авахыг хүсч байна. Яллагдагч этгээдүүд миний охины амь насыг хууль бусаар хөнөөсөн гэдэгт би итгэлтэй байгаа” хэмээн Шаарийбуу хэллээ.

2015 оны нэгдүгээр сард Холбооны шүүхээс цагдаагийн албан тушаалтан Азилах Хадри, Сирул Азхар Умар нарыг Алтантуяагийн амийг бүрэлгэсэн хэрэгт буруутгаж, цаазаар авах ял оноосон. Тухайн үед Ерөнхий сайдын орлогч басан Нажиб Абдул Разакийн итгэмжлэгч Разак Багинда нь дээрх хоёр цагдаагийн албан тушаалтантай хамт Алтантуяагийн аллагын хэрэгт хамсаатан хэмээн буруутгагдаж байсан юм. Гэвч тэрбээр ялаас мултарсан. Харин одоо Шаарийбуу, түүний эхнэр Санжаагийн Алтанцэцэг болон зээ хүү нар нь Сирул, Азилах, Разак болон Малайзын Засгийн газрыг хариуцагчид гэж үзэж байна.