Индэр    
2021 оны 4 сарын 5
Зураг
iKon.mn сэтгүүлч, Ерөнхий эрхлэгч.

УОК-ын шийдвэрээр "хөл хоригдсон" мэргэжлийн байгууллагуудын ЗӨВЛӨМЖҮҮД

Зураг
Гэрэл зургийг MPA.mn

“Монгол Улсад ирэх оны дөрөв, тавдугаар сард халдвар хамгийн өндөр хэмжээнд бүртгэгдэх хандлагатай байна.

Тархалтын тооцооллоо хоёрдугаар сард эмнэлэгт хэвтэн эмчлүүлэгчид оргилдоо хүрч, халдвар дэгдэлтийн хоёр дахь давалгаа хоёрдугаар сард эхлэх магадлалтай байна” гэдгийг Эрүүл мэндийн сайд асан Т.Мөнхсайхан 2020.12.09-нд нээлттэй болсон Засгийн газрын хуралдаанаар хэлж байсан

Өөрөөр хэлбэл, өдөр бүр хэдэн зуугаараа нэмэгдэж байгаа COVID-19-ийн халдварын өнөөгийн нөхцөл байдалд манай улс бэлтгэсэн байх ёстой байв. Гэвч гуравдугаар сар гарснаас хойш халдварын тоо өдрөөс өдөрт эрчимжиж байгааг харсаар атал тодорхой шийдвэрт хүрэлгүй 8-ны өдрийг угтсан. Энэ өдөр 108 тохиолдол бүртгэгдэж, өнгөрсөн жилийн хугацааныхаа рекорд хэмжээнд хүрсэн юм. 

Тэгвэл энэ өдрөөс хойш өнөөдрийг хүртэлх сар орчмын хугацаанд мэргэжлийн байгууллага буюу Эрүүл мэндийн яам, ХӨСҮТ-өөс тодорхой арга хэмжээ авахгүй бол оройтох тухай зөвлөмжийг УОК-т нийт ГУРВАН удаа хүргүүлжээ. Олон нийтэд ил болоогүй энэхүү зөвлөмжийг УОК, ЗГ одоог хүртэл хүлээж аваагүй шалтгаан нь “Эдийн засгаа аврах” стратеги байв. 

Харамсалтай нь эдийн засаг хэдий чухал ч амь тулахад аль ч улс эрүүл мэндээ чухалчилна гэдгийг өнгөрсөн долоо хоногт хилээ түр хааж, экспорт саатахад хүргэсэн урд хөршийн хандлагаас бид бүгд харлаа

Коронавирусийн халдварын 10,218 тохиолдол өнөөдрийн байдлаар Монголд бүртгэгдээд байгаагийн 7,311 буюу 70% нь гуравдугаар сарын 1-нээс хойш батлагдсан юм. Энэ хугацаанд есөн хүн нас барж, 51 хүний бие хүнд, 9 хүн маш хүнд байна. 

Ийм нөхцөл байдал үүсэхээр байгааг анхааруулж, гуравдугаар сарын 11-нд ЭМЯ, ХӨСҮТ зөвлөмж хүргүүлж, 28 хоногийн хөл хорио тогтоох санал гаргасан байдаг. Гэвч УОК дэмжээгүй

2021.03.11

Энэ өдрийн байдлаар 80 хүнээс шинээр халдвар илэрч, улсын хэмжээнд бүртгэгдсэн тохиолдол 3,561 болж, нэг хүн нас барсан бол эмнэлэгт 697 хүн эмчлүүлж, гурван аймагт халдвар бүртгэгдээд байсан үе. Өөрөөр хэлбэл, тухайн долоо хоногт шинээр бүртгэгдсэн халдварын тоо өмнөх долоо хоногоосоо 2 ДАХИН нэмэгдсэн байсан ч өнөөдөртэй харьцуулбал нөхцөл байдал зохицуулж болохуйц байв

Хоёрдугаар сарын 23-наас эхэлсэн вакцинжуулалтад хамрагдсан хүний тоо 48,265 болсон байлаа.

Яг энэ үед дээр дурдсанчлан ЭМЯ, ХӨСҮТ хөл хориог 28 хоног тогтоох санал гаргахдаа дараах ЭРСДЭЛҮҮДИЙГ анхааруулж, “Халдварын гинжин хэлхээ тасраагүй байхад хөл хориог сулруулснаас дараах нөхцөл байдал үүссэн” гэдгийг тодотгосон байна.

  • Халдвар эрчимтэй нэмэгдсэнээр эрүүл мэндийн салбарын ажилчид эмнэлгийн бус орчинд халдвар авах нь нэмэгдэж, эх уурхай нь тодорхойгүй тохиолдлууд ихэссэн
  • Коронавирусийн тархалтын үнэлгээгээр халдвар хүн амын дунд өргөн тархсан буюу “Улаан” түвшинд хүрсэн
  • Аймгууд руу халдвар зөөвөрлөгдөж, орон даяар тархах эрсдэлтэй
  • Вакцинжуулалтад хамрагдсан иргэд дараагийн тунгаа хийлгэхээс өмнө халдварт өртөж, дархлаажуулалтын үр дүн буурах эрсдэлтэй
  • Өвчтөнүүдийн байдал хүндэрч, амьсгалын аппаратад орох хүний тоо нэмэгдэж, сүүлийн долоо хоног(2021.03.04-03.11)-т коронавирусийн халдварын шалтгаантай нас баралт 2 дахин нэмэгдсэн
  • Шинжилгээний тоо, ачаалал нэмэгдсэн бөгөөд лабораторийн эмч ажилчид амралтгүй ажилласнаас ажлаас халшрах байдал үүсэж байгаагаас гадна тоног төхөөрөмжүүд доголдох тохиолдол үүссэн.

Ийм учраас хамгийн үр дүнтэй арга нь 28 хоног хөл хорио тогтоох бөгөөд тийм боломжгүй бол 10-аас дээш хүн цуглахгүй, фитнесс, баар, ресторан, караоке зэрэг олон хүн цугладаг газруудыг түр хугацаанд хаах гэгчлэн саналуудаа гаргажээ.

Харин УОК “Ковидын халдварыг хумих, цар тахлаас урьдчилан сэргийлэхэд иргэн бүрийн оролцоо чухал. Иргэн бүр хариуцлагатай байж, халдвар хамгааллын дэглэмийг сайтар мөрдөж дагахыг анхааруулж байна” гээд өнгөрөв.

Маргаашаас нь эхлээд COVID-19-ийн өдөрт бүртгэгдэх тохиолдол 100-аас давж, графикийн муруй тасралтгүй дээш өгссөөр байгаа билээ. 

График. Хоёрдугаар сарын 23-нд Бүх нийтийн бэлэн байдлын зэргийг бууруулснаас хойш хойш шинээр бүртгэгдсэн халдварын тоо

2021.03.13

Уг зөвлөмжийг УОК, Засгийн газар хүлээн авсангүй.

“Хатуу хөл хорио тогтоохгүй. Гуравдугаар сарын 15-наас “Улбар шар” түвшин рүү 14 хоног шилжинэ” гэсэн шийдвэрийг УОК гаргав

2021.03.16 

Тав хоногийн дараа буюу 16-ны өдөр ЭМЯ, ХӨСҮТ дахиад УОК-т зөвлөмж хүргүүлэхдээ эмнэлгийн 213 ажилтан халдвар авсныг сануулж, энэ эрчээрээ долоо хоног үргэлжлэхэд өдөрт шинээр илрэх халдварын тоо 400 давахаар байгаа тооцооллыг хавсаргажээ.

Мөн өмнөх эрсдэлүүдээс гадна коронавирусийн халдвартай иргэдийг эмчилж байгаа голлох эмнэлгүүдийн ор хүрэлцээгүй болсныг мэдэгдсэн байна. Тусгаарлах байрны хүрэлцээ ч дууссан тул Бүх нийтийн бэлэн байдлын зэрэгт 14 хоногийн хугацаатай яаралтай шилжүүлээд дархлаажуулалтыг эрчимжүүлэх хүсэлтэй байгаагаа уламжилжээ. 

2021.03.18

Уг саналыг мөн л хэрэгжүүлсэнгүй.

Засгийн газрын ХМОНХГ-ын дарга Ц.Ганзориг тухайн өдөр “COVID-19-ийн өдөрт бүртгэгдэх халдварын тоо 200-аас даваад эхэлбэл бүх нийтийн хөл хорио тогтоохоос өөр аргагүй” хэмээн мэдээлсэн. 

Харин МУИС-ийн эрдэмтдийн гаргасан математик тооцооллоор гуравдугаар сарын сүүлчээс өдөрт 200-аас дээш тохиолдол бүртгэгдэнэ гэж үзсэн. 

Гуравдугаар сарын 20-н хүртэлх хугацаанд найм хоногийн дотор дотоодын халдвар 1,000-аар нэмэгдэн, 4,000-ыг давж, анхны 1,000 тохиолдлоос 8, хоёр дахь 1,000 тохиолдлоос 4 ДАХИН богино хугацаанд ийнхүү тархсан үзүүлэлт юм. 

2021.03.22

“Дөрөвдүгээр сарын 5-н хүртэл хатуу хөл хорио тогтоохгүй. Үйлдвэр, үйлчилгээний байгууллагуудын цагт зохицуулалт хийнэ” гэсэн шийдвэрийг УОК гаргав.

Засгийн газар, УОК-ын зүгээс аль болох аж ахуйн нэгж, иргэдийн үйл ажиллагааг хязгаарлахгүйгээр ажиллаж, халдварын тоо нэмэгдэж байгаа ч явуулын эмчилгээний багийг гаргах ажлууд зохион байгуулагдаж эхэлсэн учраас хатуу хөл хориог зохион байгуулахгүй гэдгээ Шадар сайд С.Амарсайхан хэлсэн юм. 

2021.03.26

Энэ өдрийн байдлаар Улаанбаатар хотоод COVID-19 зөөвөрлөгдсөн аймгийн тоо 11 болоод байсан бөгөөд тухайн өдөр нийслэлд 370, долоон аймагт 67 тохиолдол батлагдсан юм

График. Аймгуудад халдвар зөөвөрлөгдсөн байдал (Аймаг бүрийн нэр дээр дарж, зөөвөрлөгдсөн халдвар бүртгэгдсэн мэдээллийг харах боломжтой)

Засгийн газрын тэргүүн Л.Оюун-Эрдэнэ мөн тухайн өдөр дөрөвдүгээр сарын 5-19-нд хатуу хөл хорио тогтоох магадлал маш өндөр байгааг мэдээлж байв. 

Харин үдээс хойш нь хуралдсан УОК Улаанбаатар хотоос орон нутаг руу гарах хөдөлгөөнийг 14 хоног хаахаар шийдсэнээ мэдээлээд эрсдэлтэй зарим газрын үйл ажиллагааг хязгаарлахаар болсноо мэдэгдсэн юм

2021.03.29

Мэргэжлийн байгууллагууд ахиад л зөвлөмж хүргүүлжээ.

Эрүүл мэндийн ажилчдын халдварын тоо 327 буюу үүний өмнөх зөвлөмж хүргүүлснээс хойших 13 хоногийн дотор 114 буюу 53% нэмэгдсэн байна. Энэ эрчээрээ явбал дөрөвдүгээр сарын 5-наас өдөрт бүртгэгдэх халдварын тоо 500, 12-ноос 800 болж өсөх магадлал өндөр болсныг сануулжээ. 

Нас баралтын тоо нэмэгдэхээс гадна орны хүрэлцээгүй болж байгаа зэрэг эрсдэлүүдийг мэргэжлийн байгууллага анхааруулсан байна. Энэ үед ШШГЕГ-ын харьяа саатуулах байранд халдварын 114 тохиолдол батлагдсан байсан гэдгийг сануулъя. 

Гуравдугаар сарын 29-ний энэ өдөр шинээр 575 хүн өвчилж, улсын хэмжээнд бүртгэгдсэн халдварын батлагдсан тохиолдлын тоо 7,589 болж, 12 аймагт халдвар тархан Улаанбаатар хот Хятадын Ухань болж хувирсан байв. 

Тиймээс ЭМЯ дөрөвдүгээр сарын 3-18-нд "УЛААН" түвшин буюу хатуу хөл хорио тогтоох санал гаргасныг УОК дэмжсэн гэж байв

2021.03.31

Үүнээс хоёр хоногийн дараа буюу халдварын батлагдсан тохиолдол 858-аар нэмэгдэж, дахин хоёр аймагт COVID-19 тархсан үед Засгийн газар хуралдахдаа “Улаанбаатарт хатуу хөл хорио тогтоохгүй, зарим салбарын үйл ажиллагааг хязгаарлана” гэсэн шийдвэрээ танилцуулсан юм. 

Өөрөөр хэлбэл, халдварын хоёр дахь давалгаа үргэлжилж, эрчимтэй тархаж байгаа үед УОК, Засгийн газар мэргэжлийн байгууллагаас өгсөн зөвлөмжөөс хамгийн үр дүн багатай хувилбарыг хэрэгжүүлсэн буюу сонсоогүйтэй адил гэсэн үг. 


Бэлэн тооцоолол дээр бэлтгэл хангаж чадаагүй Засгийн газар эдийн засгаа ч гацааж, эрүүл мэндийн салбараа ч “унагав” уу

 
Гэрэл зургийг MPA.mn

Хоёрдугаар сарын 23-наас хойш өнөөдрийг хүртэл COVID-19-ийн халдвараар 7,495, гуравдугаар сарын 1-нээс хойш 7,311 хүн шинээр өвчлөөд байна. Эмнэлгүүд орны нөөцөө шавхан, өвчтөнүүд гэртээ тусгаарлагдаж байгаа бөгөөд эмнэлгийн ажилтнууд туйлдаж, цөхрөнгөө барж байгааг салбарынхан хэлсээр. 

Засгийн газар, УОК “Дөрөвдүгээр сарын 5-н хүртэл хөл хорихгүй” хэмээн удаа дараа мэдэгдсэн нь өдөрт бүртгэгдэх шинэ халдварын тоо 500-800 хүрэхийг хүлээж, экпортын гол гарц болох БНХАУ хилээ хаахыг хүлээсэн баймааргүй. Шийдвэр гаргагчид вакцинд бүх найдлагаа тавьсаар. Гэвч эхний тунгаа хийлгэсэн хүмүүсээс 500 гаруй нь халдвар авсан бөгөөд тэр хүмүүс хагас жилд дархлаажуулалтад хамрагдах боломжгүй болсон гэсэн үг. Мэргэжилтнүүдийн анхааруулж байсанчлан дархлаажуулалтын үр дүн буурч эхэлж байгааг энэ үзүүлэлт нотолж байна. 

Нэг тооцоолол хийж үзье. 

ЭМЯ-ны мэдээлснээр нэг хүний эмчлэх ӨРТӨГ ойролцоогоор 4 сая төгрөг байгаа. Өнөөдрийн байдлаар 2,107 хүн эмнэлэгт эмчлүүлж байгаа бол бидний тооцоогоор гэртээ эмчлүүлж байгаа хүний тоо 2,000 давчихсан. Энэ хүмүүст ч мөн эмчилгээний өртөг тооцогдож байгаа. 

Хэрэв Засгийн газар, УОК гуравдугаар сарын 11-нд ЭМЯ болон ХӨСҮТ-өөс өгсөн зөвлөмжийн дагуу 28 хоногийн хөл хорио тогтоосон байсан бол өнгөрсөн 20 хоногт халдвар авсан 5,677 хүнээс халдвар авахгүй байх боломжтой хүн дор хаяж 80%, 16 аймагт халдвар тархахгүй, Замын-Үүд нээлттэй байж болох байв.

Харин өдгөө эмнэлэгт хэвтэн эмчлүүлж байгаа 2,107 хүний эмчилгээний өртөг 8 тэрбум гаруй төгрөгөөс илүүтэй 9 хүн амиа алдлаа. 

Халдварыг тогтоож, гинжин хэлхээг таслах цорын ганц арга нь хөл хорио гэдгийг аймгуудын жишээнээс тодорхой харж болохоор байна.

Дотоодын ганц ч халдвар бүртгэгдээгүй байхад мэргэжлийн байгууллагын зөвлөмжийн дагуу хөл хөдөлгөөнийг хязгаарлаж, хилээ хааж, эдийн засгаа түгжиж байсан Засгийн газар COVID-19-ийн халдварын оргил үед бүгдийг нээлттэй орхисон нь өнөөдрийн үр дүнд хүргэв. 

Ийнхүү мэргэжлийн байгууллагуудынхаа зөвлөмжид "хөл хорьж", “Эцсийн мөч хүртэл эдийн засгаа нээлттэй байлгана” гэж зүтгэсэн Ерөнхий сайд Л.Оюун-Эрдэнэ, аль болох хөл хорио тогтоохгүй, ААН-үүдээ дэмжинэ гэсэн УОК-ын дарга С.Амарсайхан нарын шийдвэрийн үр дүн энэ аж.

x