"Далайн хаадууд" клуб 15 жилийнхээ ойн хүрээнд "Blue Mongolia Buir 2026" фестиваль зохион байгуулна
Задгай усанд сэлэлт, спортын чиглэлээр дагнаж үйл ажиллагаа явуулдаг "Далайн хаадууд" клуб 15 жилийнхээ ойн хүрээнд Дорнод аймгийн Халхгол суманд "Blue Mongolia Buir Festival 2026"-г зохион байгуулна.
Тодруулбал энэ сарын 28-наас 30-ныг дуустал Буйр нуурт болох аж.
Энэ үеэр Монголд анх удаа задгай усанд сэлэлтийн тэмцээн хийхээр төлөвлөжээ.
Тэмцээнийг зохион байгуулагч Б.Ангараг "Монголд анх удаа болох задгай усанд сэлэлтийн тэмцээнд 10 орны 100 гаруй тамирчин өрсөлдөхөөр мэдүүлэг өгсөн.
Одоогоор Япон, АНУ, Тайланд, Турк, Хятад, Орос, Иран зэрэг улсуудаас тамирчид ирэхээр төлөвлөж байна. Мөн Монголын тамирчид өрсөлдөхөөр бэлтгэлдээ гарсан. Гурван өдрийн турш өрсөлдөх тэмцээнийхээ хөтөлбөр төлөвлөгөөг бид гаргаж байгаа. Өсвөр үе, ахмад, насанд хүрэгчид гэсэн насны ангиллаар задгай усанд сэлэлтийн тэмцээнийг зохион байгуулах стандарт дүрмийн дагуу эх орондоо анх удаа мэргэжлийн байгууллагуудтай хамтран зохион байгуулна.
Тэмцээнд урьсан тамирчид маань олон улсад зэрэглэл өндөртэй, тив, дэлхий, олимпын аваргууд ирнэ. Үүний нэг нь бидний сайн мэдэх PHYSICAL: ASIA 100 шоунд Япон улсын багийг ахалж оролцсон тамирчин байгаа. Одоогоор бид нэрийг нь нууцалж байна" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
