Нийслэлчүүд энэ оны төгсгөл буюу өвлийн улиралд дүүжин замын тээврээр зорчих нь
Франц улсын Засгийн газрын 316 тэрбум төгрөгтэй тэнцэх хэмжээний еврогийн нэн хөнгөлөлттэй зээлээр Улаанбаатар хотын Яармаг, Арцат-Хархорин, Өнөр хороолол чиглэлд дүүжин замын тээврийн барилга байгууламжийг барьж буй.
Уг тээвэр хэзээ ашиглалтад орох талаар нийслэлийн Засаг даргын орлогч Т.Даваадалай "Дүүжин тээврийн барилга угсралтын ажлыг энэ оны нэгдүгээр улиралд дуусгаж, хоосон туршилтыг эхлүүлнэ.
Хоёрдугаар улирлаас ачаалалтай туршилтыг 3-6 сар үргэлжлүүлнэ. Үүний дараа 11, 12 дугаар сараас зорчигчдыг тээвэрлэхээр төлөвлөсөн" гэв.
Түүний мэдээлснээр 2026 оны төгсгөл буюу өвлийн улиралд нийслэлчүүд дүүжин тээврээр зорчдог болж таарах нь.
Энэ сарын 24-ний байдлаар дүүжин тээврийн барилга байгууламжийн бүтээн байгуулалтын гүйцэтгэл 60.5 хувьд хүрсэн тухай мэдээлж байсан юм.
Дүүжин замын тээвэр нь 19 цамхагтай, хамгийн өндөр нь 46 метрийн өндөр, 4.2 километр замтай, цагт 3,500 зорчигч тээвэрлэх хүчин чадалтай бөгөөд нэг кабинд 10 хүн суух багтаамжтай байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
