Х.Нямбаатар: ААН, байгууллагууд хүн хүч ихээр шаардагддаг ажлын байранд хиймэл оюун ухаан ашиглаж, дэвшил гаргамаар байна

Гэрэл зургийг MPA агентлагийн онцгой зөвшөөрөлтэйгөөр ашиглав

Нийслэлийн удирдах ажилтнуудын шуурхай хуралдаан өнөөдөр болж, хөрсний ус, үерийн хамгаалалтын барилга байгууламжийн төслүүдийн хэрэгжилт, ажлын байруудад хиймэл оюун ухааныг ашиглах шаардлага үүсэж буй талаар хэлэлцжээ.

Есөн байршилд 102.72 километр үерийн хамгаалалтын даланг барих юм байна. Уг төслийн ТЭЗҮ болон байгаль орчин, нийгмийн нөлөөллийн үнэлгээг “Хот төлөвлөлт, судалгааны институт” ОНӨААТҮГ боловсруулж байгаа бөгөөд төслийг 2028 он хүртэл хэрэгжүүлэх аж.

Нийслэл хотод баригдах үерийн далангуудын байршил:

1. Улиастай голын үерийн хамгаалалтын барилга байгууламж
2. Сэлбэ голын үерийн хамгаалалтын барилга байгууламж /Дамбын гүүрнээс Шарга морьтын гүүр/
3. Дарь-Эхийн үерийн хамгаалалтын суваг
4. Баянзүрх дүүргийн 11 дүгээр хорооны үерийн хамгаалалтын суваг /Ургах наран хороолол/
5. Хужирбулангийн үерийн хамгаалалтын суваг
6. Био-Сонгино-Туулын үерийн хамгаалалтын байгууламж
7. Тахилтын үерийн хамгаалалтын суваг
8. Толгойт гол, Зүүнсалааны үерийн хамгаалалтын суваг
9. Борооны усны төв магистраль шугам /Зүүн бүс/төсөл.

Ирэх онд ус их тогтдог байршлуудад нийт 30 км борооны ус зайлуулах шугам угсарна. Ингэснээр үерийн эрсдэлийг бууруулж, хотын эко систем тэнцвэржиж, голын урсац тогтворжино гэж тооцоолжээ.

2025 онд 10 байршилд 16 км борооны ус зайлуулах шугам угсрахаар төлөвлөснөөс өнөөдрийн байдлаар найман байршилд 8.6 км авто замын борооны ус зайлуулах шугам хоолойг угсарчээ.

1. БГД-ийн 4-р хороо, Төмөр замын авто зогсоол орчмын борооны ус зайлуулах шугамын ажил /он дамжин хэрэгжинэ/
2. ХУД-ийн 15-р хороо, “Энхтайваны гүүр"-ний доод хэсгийн зам талбайн ус зайлуулах шугамын ажил
3. БГД-ийн 5-р хороо, Алтай хотхоны 14-р байр орчмын борооны ус зайлуулах шугамын ажил
4. БГД-ийн 24, 26-р хороо Энгельсийн гудамжны авто замын борооны ус зайлуулах шугамын шинэчлэл, өргөтгөлийн ажлын зураг төсөл
5. ХУД-ийн 3-р хороо, ТЭЦ-3-ын арын уулзвараас Дунд голын гүүр хүртэлх борооны ус зайлуулах шугамын ажил
6. ЧД-ийн 2-р хороо, Хувьсгалын гудамжны борооны ус зайлуулах шугам
7. ХУД-ийн 3, 5-р хороо, Чингисийн өргөн чөлөөний борооны ус зайлуулах шугамын ажил /он дамжин хэрэгжинэ/
8. СХД, Драгон орчим
9. БЗД-ийн Нарт хотхон, Нарантуул захын зүүн талд

10. БГД, Гандан орчимд борооны ус зайлуулах шугам угсарлаа. 

Харин хиймэл оюун ухааныг ашиглах тухайд хотын дарга Х.Нямбаатар "Сүүлийн жилүүдэд техник технологийн дэвшил хурдацтай өсөж, хиймэл оюун ухаан салбар бүрд их бага хэмжээгээр нэвтэрч байгаа. ААН, байгууллагууд хүн хүч ихээр шаардагддаг ажлын байранд хиймэл оюун ухаан ашиглаж дэвшил гаргамаар байна. Мэдээж бүх байгууллага AI ашиглах нь зарим зүйлд тохиромжгүй.

Google компанийг үүсгэн байгуулагч хүн сантехникийн слесарь, цахилгаанчин, гагнуурчин мэргэжлийг AI орлож чадахгүй гэж хэлсэн байсан. Туршлага хуримтлуулсан, өндөр мэргэжилтнүүд их цалин авна. Бичиг баримт боловсруулах, нэгтгэл гаргадаг ажил, албан тушаалтнуудыг хиймэл оюун ухаанаар орлуулна гэдгийг салбарын мэргэжилтнүүд ярьж байна.

НЗДТГ-ын захиргааны орон тоо, бүтцийг шинэчлэх асуудлыг дахин ярих шаардлагатай байна" гэв.