"Ирэх таван жилд зэс, төмөр хайлуулах болон нефтийн үйлдвэрийг ашиглалтад оруулна"
Засгийн газар ирэх таван жилд хийх шинэтгэлийнхээ талаар өчигдөр танилцуулсан. Энэ үеэр ирэх таван жилийн хугацаанд Монгол Улсад одоо явж байгаа үйлдвэрүүдээс өөр шинээр үйлдвэр ашиглалтад орох уу гэх сэтгүүлчийн асуултад Аж үйлдвэр, эрдэс баялгийн сайд Г.Дамдинням хариуллаа.
Одоогийн байдлаар Монгол Улсад нийт 141 баяжуулах үйлдвэр байгаагаас 57 үйлдвэрийнх нь үйл ажиллагаа зогссон байгаа аж.
Ашигт малтмалын тухай хуулийн нэмэлт өөрчлөлтийг АҮЭБЯ-наас боловсруулаад байгаа бөгөөд уг хуульд АМНАТ болон татварын бодлогоор үйлдвэрлэж, нэмүү өртөг шингээж эцсийн бүтээгдэхүүн үйлдвэрлэж байгаад нь илүү давуу байдал олгох хууль эрхзүйн орчныг бүрдүүлэхийг тусгасан байна.
Ирэх таван жилд гурван том баяжуулах болон боловсруулах үйлдвэрүүдийг ашиглалтад оруулах зорилго тавьж байна гэв.
- Монгол Улс жилдээ 560,000 тонн цэвэр зэс хайлуулах хүчин чадалтай анхны том хэмжээний цогцолбортой болно.
- Мөн Дархан Сэлэнгийн бүс нутагт 1,000,000 тонн төмөр хайлуулах чадвартай төмрийн үйлдвэр баригдана.
- Нефть боловсруулах үйлдвэрийн ажил 50 хувийн гүйцэтгэлтэй явж байна. Бүх том тоног төхөөрөмжүүдийн суурь дэд бүтэц хийгдээд дууссан.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
