Ш.Энхийн-Одын "South Carolina Gamecocks" энэ улирлын хоёр дахь хожлоо авлаа

Хойд Америкийн Үндэсний Сагсан Бөмбөгийн Оюутны Лиг (NCAA)-ийн "South Carolina Gamecocks" багт данстай Ш.Энхийн-Од өнөөдөр хоёр дахь тоглолтод оролцов.

Тэд "Southern Miss Golden Eagles" багийг талбайдаа хүлээн авч, нэмэлт цагт 83:79-өөр ялалт байгууллаа.

Талбайн эздээс Мийчи Жонсон 33 минут тоглохдоо 33 оноо авч багаа тэргүүлсэн бол сэлгээнээс Эли Эллис 20 оноо авчээ. Харин Ш.Энхийн-Од талбай дээр хамгийн олон буюу 37 минут гарахдаа 17 оноо, 5 самбар, 3 оновчтой дамжуулалт гүйцэтгэсэн байна.

Ялангуяа нэмэлт цагт Майк эсрэг багаас бөмбөг "хулгайлаад" чухал хоёр оноо аваад зогсохгүй айлын тоглогчоос алдаа салгаж дөнгөсөн юм.

М.Жонсон 33 онооныхоо 14-ийг нь сүүлийн дөрвөн минут орчимд авчээ. 

Зочин багаас Исаак Таверас 25 оноо, 8 самбар, Тайлик Уикс 20 оноо, 7 самбараас бөмбөг авч, багаа манлайлсан ч хожил авч чадаагүй юм.

Өмнөд Каролинагийн их сургуулийн баг улирлын эхний дөрвөн тоглолтоо талбайдаа хийх хуваарьтай. Орон нутгийн цагаар энэ сарын 13-нд "Presbyterian Blue Hose"-ийг хүлээн авах бол зургаа хоногийн дараа буюу 19-нд "Radford" их сургуулийн баг зочилж ирнэ.