Б.Жавхлан: Хадгаламжийн даатгалын корпораци дээрх $230 сая, Төрийн банканд эзэмшиж буй $50 саяыг мөнгөжүүлж, валютын нөөцөд шилжүүлнэ
Засгийн газрын өнөөдрийн хуралдаанд валютын нөөцийг нэмэгдүүлэх ажлын хэсэг тайлангаа танилцуулсан байна. Үүнтэй холбогдуулан ямар шийдвэр гаргасан талаар Сангийн сайд Б.Жавхлан мэдээлэл өглөө.
Тэрбээр "Төв банк дээр байгаа валютын нөөцийг санхүүгийн зах зээлд гарч буй боломжуудыг ашиглаж, богино хугацаанд нэмэгдүүлнэ. Энэ чиглэлээр Санхүүгийн тогтвортой байдлын зөвлөл өчигдөр хуралдаж, хэд хэдэн шийдвэр гаргасан. Тухайлбал манай дотоодын санхүүгийн институцууд Засгийн газрын өмнө нь гаргасан бондуудын 600-800 саяыг эзэмшиж байгаа. Үүнийг мөнгөжүүлж, дотоодод оруулж ирснээр валютын нөөцийг нэмэгдүүлэх боломжтой.
Засгийн газрын зүгээс Хадгаламжийн даатгалын корпораци дээрх 230 сая ам.доллар, Төрийн банканд эзэмшиж байгаа 50 сая ам.долларыг мөнгөжүүлж валютын нөөцөд шилжүүлж авах шийдвэр гаргасан. Мөн Монголбанк алт дээр өөрийн нөөц боломжийг дайчилна.
Эрдэнэт, Дарханы төмөрлөгийн үйлдвэр, Эрдэнэс Тавантолгой, Эрдэнэс критикал минерал гэсэн компаниуд нийлээд энэ жил нийлээд 500 сая ам.долларын нэмэлт экспорт хийнэ гэж байсан. Засгийн газраас үүнд нэмэлт үүрэг өгч, нэг тэрбум ам.долларт хүргэхийг даалгасан. Төрийн томоохон аж ахуйн нэгжүүд энэ жил хийх шинэ хөрөнгө оруулалт, импорттой холбоотой асуудлаа эрэмбэлж, хойшлуулах үүргийг тогтоолоор албажуулсан.
Мөн Н.Учрал сайдаар ахлуулсан Хэмнэлтийн тухай хуулийг хэрэгжүүлэх, төсвийн зарцуулалтын үр өгөөжийг нэмэгдүүлэх Үндэсний хороо ажиллаад эхэлсэн" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
18 СЭТГЭГДЭЛТЭЙ
|
