Хил хамгаалалтын ажилтан АНУ-д нэвтрэхийн тулд өөрт нь хөхөө харуулахыг эмэгтэйчүүдээс шаарддаг байсныг тогтоожээ

АНУ-ын хилийн хамгаалалтын албаны нэг ажилтан эрх мэдлээ ашиглан цагаач эмэгтэйчүүдэд бэлгийн дарамт үзүүлдэг байсныг шалгаж тогтоосноо тус улсын прокурорын ерөнхий газар мэдээлжээ.

Өчигдөр олон нийтэд ил болсон шүүхийн бичиг баримтад өгүүлснээр 53 настай Шэйн Миллан гуравдугаар сарын 7-ны өдөр гэм буруугаа хүлээсэн юм байна.

Тэрбээр Нью-Йорк мужийн Жефферсон дүүрэгт орших албан тасалгаанаасаа вэб камераар АНУ-ын өмнөд хилээр нэвтэрсэн цагаачидтай ярилцаж, шаардлагатай бичиг баримтыг бүрдүүлэх үүрэгтэй ажилладаг байжээ.

Түүнийг ингэхдээ цагаач эмэгтэйчүүдэд хөхөө харуулах шаардлага тавьж, зөвшөөрөөгүй тохиолдолд хилээр нэвтрэх зөвшөөрөл өгөхгүй хэмээн сүрдүүлдэг байсныг прокурорууд баримтаар тогтоосон юм байна.

Тухайлбал 2023 оны наймдугаар сарын 10-ны өдөр Миллан вэб камераар дамжуулан Техас мужийн Ийгл Пасс хотод байгаа нэг настай охинтой цагаач эмэгтэйтэй ярилцжээ.

Ингэхдээ тэр эмэгтэйн цээжинд шивээс байдаг тухай бичиг баримтад нь дурдсан гэж худлаа хэлээд харуулахыг шаардсан байна.

Эмэгтэй шивээсгүйгээ хэлсэн ч Миллан үзүүлэхийг шаарджээ.

Дараа нь эмэгтэй хүүхдээ газарт тавиад цамцаа сөхөж харуулсан байна. Ярилцлага дуусах үед Миллан шивээс байхгүйг баталгаажуулахын тулд дахин цээжээ харуулахыг шаарджээ.

Эмэгтэйг эсэргүүцэхэд тэр АНУ-д нэвтрэхэд шаардлагатай бичиг баримтад нь гарын үсэг зурахгүй хэмээн сүрдүүлснийг шүүхийн баримтад өгүүлсэн байна.

Хоёр дахь удаагаа харуулсны дараа Миллан “ОК. АНУ-д тавтай морил” гэж хэлсэн нь нууц камерт бичигджээ.

Өөр нэг баримтад өгүүлснээр Миллан тухайн оны наймдугаар сарын 25-ны өдөр нөхөр, хүүхдүүдтэйгээ хамт өрөөнд байсан эмэгтэйтэй  ярилцахдаа ижил дарамт шахалт үзүүлсэн байна.

Тэр эхлээд нөхөр, хүүхдүүдийг нь өрөөнөөс гаргаад бас л шивээс байгаа эсэхийг шалгах хэрэгтэйг эмэгтэйд хэлжээ.

Цагаач эмэгтэй эхний удаа үзүүлсний дараа ярилцлагын төгсгөлд Миллан дахин үзүүлэхийг шаардсан нь баримтаар батлагдсан байна.

Энэ мэтээр Миллан олон удаа цагаач эмэгтэйчүүдэд бэлгийн дарамт үзүүлсэн нь мөрдлөгийн явцад тогтоогджээ.

Тэр бас ажлын компьютер дээрээсээ “цамц, хөхөвчийг чинь сөхөж харах хэрэгтэй байна” гэх мэт өгүүлбэрийг испани хэлээр яаж хэлдгийг хайсан баримт олдсон байна.

Милланы шүүх хурал долдугаар сарын 7-нд товлогджээ. Хэрвээ түүний буруутай нь тогтоогдвол хоёр жил хүртэл хугацаагаар шоронд хоригдох ял сонсох юм байна.

Эх сурвалж: Tribune News Service