10 дугаар хорооллын дулааны шугамын шинэчлэл нэг аж ахуйн нэгжийн хариуцлагагүйгээс болж удааширчээ

Гэрэл зургийг MPA агентлагийн онцгой зөвшөөрөлтэйгөөр ашиглав

10 дугаар хорооллоос 25 дугаар эмийн сан хүртэл дулааны 11г,д магистралийн 2Ф800 мм голчтой шугамыг 2Ф1000 мм голчтой болгож, 1.6 км хос шугамаар өргөтгөн шинэчлэх ажил энэ сарын 15-нд дуусна гэж УБЗАА-наас мэдээллээ.

НЗДТГ-ын хэвлэл мэдээлэл, олон нийттэй харилцах хэлтсээс мэдээлснээр 10 дугаар хорооллын дулааны шугамыг шинэчлэх ажил 2024 оны долдугаар сарын 15-нд эхэлсэн ч тендерт шалгарсан зургаан аж ахуйн нэгжийн тав нь 70-100 хувийн гүйцэтгэлтэй ажлаа үргэлжлүүлж байгаа бол нэг аж ахуйн нэгжийн хариуцлагагүй байдлаас болж ажил удаашран, нэгдсэн хучилт хийх боломжгүй болжээ. Харин бусад аж ахуйн нэгжийн төлөөлөлтэй зөвшилцөн нэмэлт хүч гаргаж, дулааны шугамын өргөтгөл шинэчлэлтийг гэрээнд заасан хугацаандаа буюу энэ сарын 15-нд дуусгахаар болжээ.

Улаанбаатар хотын Ерөнхий менежер бөгөөд Захирагчийн албаны дарга Ц.Төрхүү "Есдүгээр сарын 15-н гэхэд 11г,д магистраль буюу 10 дугаар хорооллын дулааны шугамын ухсан нүхээ булна. Үүний дараа Нийслэлийн Авто Замын Хөгжлийн Газраас явган хүний болон авто замын тохижилтыг хийхээр болж байна. Уг нь дулааны шугамыг шинэчилсэн компаниуд тохижилтыг хийх ёстой.

Яам, тамгын газрынхан тендерт чадамжтай компаниуд шалгаруулж баймаар. Чадамжгүй компаниуд нь юм хийхгүй, материалын мөнгө хайгаад явж байна. Үүнээс болж иргэд хохирлыг үүрч, бухимдаж байна. Дулааны шугам шинэчлэлийн бүсийн иргэдийг хоёр сар халуун усгүй байлгалаа. Уучлал хүсье.

Нөгөө талаасаа шугамын шинэчлэлийг чанартай хийхийн тулд гүйцэтгэгч байгууллагыг хэт их шахаж болохгүй байна. Чанаргүй ажил хийчихвэл өвөл гэмтэл гарахыг үгүйсгэхгүй. Шугамын шинэчлэлд Нийслэлийн Хөрөнгө Оруулалтын газраас хяналт тавина" гэж учирлав.

Дулааны шугам шинэчлэлийн ажил дуусангуут Саппорогоос 25 дугаар эмийн сан хүртэл 1.6 км авто зам барих ажлыг Нийслэлийн Замын Хөгжлийн Газар гүйцэтгэх гэнэ.

Улаанбаатар хотын хэмжээнд нийт 390 гаруй км урт дулааны шугам сүлжээ байдаг бөгөөд эдгээрийн ихэнх нь 30-60 жилийн насжилттай байна. Дээрх 11г,д магистраль шугам 1984 онд ашиглалтад оржээ.